|
 |
 |
 |
|
رقم المشاركة : ( 1 )
23 - 08 - 2020, 11:56 AM
|
|||||||||||
|
|||||||||||
 ساعات نرتبك بتهديدات و اوجاع مخيفة.. واحد طوله تلاتة متر و حاطط خوذة نحاس و لابس درع وزنه 57 كجم مغطى رجليه نحاس و شايل رمح وزن سنه 7كجم و ممشى قدامه شاب شايله ترسه.. يعنى معركة خسرانة خسرانة.. ساعات تلاقيها مقفلة اوى و كل يوم الشيطان يطلعلك لسانه و يعايرك.. ورينى قوتك.. فين مسيحك..؟؟! خوف و رعب.. يقول الكتاب كده. 11 وَعِنْدَمَا سَمِعَ شَاوُلُ وَجَمِيعُ إِسْرَائِيلَ تَحَدِّيَاتِ الْفِلِسْطِينِيِّ.. حاجة مش لاقيلها منفذ.. زى الدومينو كده لما تقفل..😊 و بعدين تكتشف كمان انك لا ليك في حرب و لا قتال ..خطية مش عارف تتحداها.. مبادىء مش عارف تتنازل عنها.. بس من الضغط تقول أواجه.. عاوز تعمل فيها مقاتل بس ما لكش في السكة دى.. تحاول تتكلم لغة الشر و تلبس خوذة و منطقة بدرع و تمسك سيف و تقول اللى حيقولى كلمة حرد عشرة و اللى حيمسنى بصباعه حقطع له ايده ..و مع أول حركة تتكحرت و تقع.. 😊 مش عارف تجارى الناس في شرها.. مش عارف تتكلم اللغة دى او تتنازلى عن حشمتك او طهارتك او تجارى اصحابك في مفاسد العالم.. مش عارف ترد على الشر بنفس نوع الشر..مش عارف تكذب.. مش عاوز تتملق.. مش عاوز تخسر انسانيتك الحل ايه؟ الحل سيبك من قوة الدنيا و حمايتها .. ما نفعش معاه سيف شاول و لا عارف يمشي بالخوذة.. مالوش في الحرب.. 😊 .. ماليش في مواجهة الخطية و الشهوات.. ماليش في سكة العوج.. ماليش في سكة الشر و العنف بس متهدد و بتهان و بتوجع و بقع .. الحل خمس حجارة ملساء و مقلاع...!! طب ثوانى.. ليه خمس حجارة ملساء.. هو انت يا دواد مش واثق في ربنا من اول حجر..؟! خايف تفلت منك فتحاول تانى؟! لا.. اللى رايح يواجه المارد ده بعصاية و زلطة و مقلاع اكيد يا اما مجنون يا اما عنده ثقة غير عادية و إيمان جبار في ربنا.. طب و اللى عنده ايمان ياخد خمسة ليه؟! واخدهم لان جليات ليه اولاد أربعة.. يعنى منتهى الثقة من داود حيقتله هو و عياله.. ربنا مش بس يخلصك من مشكلة ده ينضفهالك مقشرة😊 .. ايمان طفولى عميق.. قال يقول لجليات هذا اليوم يحبسك الرب في يدى...!!! ياسيدنا اتكلم على قدك.. ايدك ايه بس اللى يحبس جليات فيها.. دى تحبس فيها عصفورة .. فراشة.. لكن جليات؟! ايمان لا يقف عند حدود المنطق و لا الواقع المر و لا المعطيات الحالية.. كوز زيت و كوار دقيق و لا خمس خبزات و سمكتين ما يشبعوش عيل حيشبعوا إيليا و الأرملة و ابنها و مايخلصوش.. حيشبعوا خمسة آلاف و يفيض .. اه... ايمان بيحلق زى النسور في سما الالتجاء لربنا و خبرة العشرة معاه.. معلش للمتكبر و المعاند و الظالم و المتجبر و المسنود على ذراعه و أمواله و قوته و معارفه معلش للشيطان اللى بيعير و بيسقط الإنسان في أشر الخطايا و فاكر انه لا يستطيع احد ان يغلبه 😔 .. الدنيا مش سايبة.. ليها اله و ضابط كل.. فتعلم كل الأرض أنه يوجد إله لإسرائيل. و تعلم هذه الجماعة كلها أنه ليس بسيف ولا برمح يخلص الرب لأن الحرب للرب.. لكل خائف لكل موجوع لكل محبط لكل مقهور و منكسر لكل ساقط مثلى لكل متألم لكل ضعيف.. مش بقوتى و لا قوتك.. الحرب للرب.. قف قدام ربنا و دخله الحرب.. اورطه بالخمسة احجار ملساء.. كلمة ربنا و وعوده حجارة ملساء.. الافخارستيا و شركة جسد الرب و دمه حجارة ملساء.. الاعتذار حجارة ملساء... الدموع حجارة ملساء.. التوبة حجارة ملساء.. الغفران حجارة ملساء. . عمل الحب ..و... و.. و..... حطها في مقلاع الصلاة و أجرى في مواجهة بجد . . و احدف حجرك و سيسقطه الله في راس جليات و سيسقط عند أقدامك .. بس الشطارة لا تبقي له بقية علشان ما يقمش و يستعيد قوته تانى . . و اتأكد أن كل الشر المحيط بيك حيهرب من وجهك لان اسم الرب برج حصين و الحرب ليه..ولم يكن سيف بيد داود. فركض داود ووقف على الفلسطيني واخذ سيفه و اخترطه من غمده وقتله وقطع به راسه فلما راى الفلسطينيون أن جبارهم قد مات هربوا... لسه قايل لواحد النهاردة في مشكلة كده.. انه لو قدمنا تنازل اكتر من كده انا ححس انى بصغر ربنا و انى بقوله معلش انا شايف انك مش حتقدر تحل.. يا صديقي اطلب و عمق طلبك.. و شوف خمس حجارة ملساء تعرف تحطهم في جرابك.. 
|
 |
|
العرض العادي
