رسائل الإبن الضال (١)

[walaa farouk]

انا مش فاكر امتي وليه وقفت قدامك وطالبت بميراثي..
مش فاكر غير اني يمكن
حسيت اني غريب في بيتك..

حسيت كأني غنمة غريبة
مش عارفة تتكيف مع حد جواه..

أنا كنت مختلف..
مش شبهك..
ومش شبه اخويا الكبير..

هو بيعمل كل حاجة انت بتطلبها..
وبيمشي حسب الأصول والقوانين..
وبيروح الحقل ويرعي غنماتك..
لكن انا ما حسيتش اني زيه..

وكنت عايز انطلق وادوق الحياة بعيد شكلها ازاي..

وصاياك كانت طوق و سلاسل في عيني..
كنت اسمعك تقول ان نيرك هين وحملك خفيف..
بس اللي شفته في بيتك كان نير تقيل اوي..
مكانش فيه شيء خفيف فيه.. ولا شيء مبهج..
كل شيء كان كئيب وقاتم وصارم وشكلي و روتيني..

الابتسامات كانت بلاستيك..
والكرامة كانت لناس ناس..
كنت اسمع ان للابن كرامة..
بس انا مكنتش حاسس اني ابن..
ولما لقيت انكم مصرين اني ابن.. طالبت بحقوقي..

ومشيت بعيد..

بعيد اوي..

كنت عاوز اوصل لأبعد نقطة عنك..

للنقيض!

كنت فاكر ان السعادة هناك.. لكن..

انا اسف مضطر امشي دلوقت..

ميعاد إطعام الخنازير!!
سياط صاحب المزرعة مؤلمة جداً..
لازم امشي دلوقت.. سلام.. هبقي اكملك بعدين..