على الكهنة ان يصلوا مع شعبهم اسبوع الألام

[walaa farouk]

اعلم و متألم مثل كثيرين لأننا لن نحضر اسبوع الألام
بمذاقه الخاص جدا خاصة الجمعة العظيمة و بهجة قداس القيامة

اعلم مقدار حزن الكثيرين
و مع هذا.. على الكهنة ان يصلوا بشعبهم هذا الأسبوع..
ليست دعوة لكسر ما اوصت به الكنيسة او كسر الحظر الذى الزمت به الدولة مواطنيها إنما اتحدث عن كهنوت أعطاه الله لنا.. حان وقت استخدامه
6 وَجَعَلَنَا مُلُوكًا وَكَهَنَةً للهِ أَبِيهِ، لَهُ الْمَجْدُ وَالسُّلْطَانُ إِلَى أَبَدِ الآبِدِينَ. آمِينَ. رؤ 1
جعلنا ملوكًا دى لما خدنا طبيعة جديدة متحررة من حتميات الإنسان العتيق وعبوديته المرة، و بقينا ملوك ذواتنا بنعمة المسيح و بنعمته ممكن لا يسيطر علينا الجسد اللى أماته الرب على الصليب. (وبالمعمودية متنا معه والأدق فيه) ولا يسود علينا العالم اللى فضحه ربنا وكشف زيفه ولا الشيطان الذي أسقطه ربنا يسوع مثل البرق من السماء
وكهنة..ده كهنوت عام يشترك فيه كل المسيحيين مش كهنوت خاص زى كهنوت آبائنا الرعاة ، فكل المسيحيين كهنة والكاهن يقدم ذبائح،... هات ورقة و قلم و اكتب ورايا 😊😊
الذبائح التي يقدمها المؤمنين اللى في الكهنوت العام و ده ينفع فيه كهنوت الراجل و المرأة ( ده لو حد جوزها مسافر او منتقل يعنى)
1. ذبيحة التسبيح (عب 15:13).
2. ذبيحة فعل الخير (عب 16:13).
3. ذبيحة الانسحاق (مز 17:51).
4. أجسادنا كذبيحة حيَّة (رو 1:12).
5. الصلاة (مز 2:141).
يبقي طول اسبوع الألام انت كاب او كام نقف ب أولادنا و نصلى مع بعض و لو ساعة واحدة من البصخة.. حتى لو مش حافظين لحن المزمور مثلا.. مش مهم.. نقرأ النبوات و نوزعها على بعض و ابانا الذى في السموات و ثوك تى تى جوم و بعدين المزمور و الإنجيل (لو انت بتعرف تقوله لحن او بتعرفى قولوا و لو ابنك او بنتك بتعرف خلوهم يقولوه)
و لو ما بتعرفوش نقراه عادى و نقرأ الطرح و نقرأ الطلبات و نقول ابانا الذى..
و ممكن الجمعة العظيمة نعمل زى ما بنعمل في الكنايس لما بتبقى زحمة و بيقعد جزء من الشعب في قاعات و يشاركوا من خلال دايرة تلفزيونية .. نحط كراسي قدام التليفزيون و نشارك مع الصلوات المنقولة و نقضي الجمعة في كنائسنا بيوتنا و هياكلنا التى هى نحن فأنتم هيكل الله و روح الله ساكن فيكم..
لا تبتأسوا.. سنقيم البصخة و نبتهج بالقيامة خارج حدود جدران الكنائس بل في حرية الروح.. "وَأَمَّا الرَّبُّ فَهُوَ الرُّوحُ، وَحَيْثُ رُوحُ الرَّبِّ هُنَاكَ حُرِّيَّةٌ." (2 كو 3: 17)
استعدوا ايها الكهنة و الملوك كى تصلوا مع بيوتكم