البركة و المحبس

[walaa farouk]

الحقيقة الاولي ان البركة عند ربنا أنواعها كتير قوي قوي ..

الفلوس دي اقل واحدة من البركات ، لكن إللي أحسن منها اضعاف ، الصحة
، الستر و راحة البال و سلام الفكر و النوم الهادي ، حب الناس و احترامهم ،
حل المشاكل و اكتشاف الخير اللي فيها ، شريك الحياة الفاضل ، الأولاد إللي يريحوا القلب ..

لكن الحقيقة التانية أن محابس البركة في يد العدل الإلهي..
بيسيبها مفتوحة و يدينا كتير برحمته و احنا ما نستاهلش..

لكن لما نتمادي في الغلط ، و نعند، و نرفض سماع صوت الله منه و من الحكماء
، الحق الالهي يبتدي يقفل المحابس واحد ورا التاني
، عدلاً و تأديباً و فرصة لمراجعة النفس (ده لو الضمير استيقظ) ..

تلاقي البركة اتحاشت، القرارات تطلع غلط ، و الخساير العاطفية ترف
، و الناس تبتدي ما تقدركش و تنفر منك من غير سبب ، و القبول اللي كان عندك يتبخر ..

تطلع لك لخبطة من غير ما تعمل اي حاجة ، و تلاقي المشاكل تكبر من غير سبب ،

و ما تلاقي لهاش حل ..

تلاقي البيت كله مشاكل ، و الخناقات فيه تبقي كل يوم بلا سبب ..

و الخدمة نفسها تفقد ثمرها ، تتعب علي الفاضي ، و تاثيرها عل الناس يتلاشي، و الخلافات فيها تزيد ..

حتي الفلوس ممكن تيجي بس ما فيهاش بركة ،
تيجي كتير و تتبعتر في عدم حكمة و سوء تصرف ، كأنك حططها في مصفي..

و الأمثلة كتير..
منها شمشون لما مشي في شهواته (قضاة ١٦ ) ، ربنا سابه شوية
.. بس لما تمادي فقد شعره و قوته و نظره و بقي يطحن في السجن زي الدواب..

منها يعقوب اللي سرق البركة (تكوين ٢٦) بس فضلت عطلانة
و ضيع من عمره ٢٠ سنة هربان في بيت خاله لغاية لما رجع طلبها بدموع (تكوين ٣٢) ..

و منها داود اللي طاوع شهوته فزني و قتل (٢ صمويل ١١) ،
فعاش أسوأ ايامه ، انطرد من ابنه و هرب منه و اتاخدت مملكته، و قعد سنين يدفع التمن..

و منهم انا و انت لو ما حطيناش مشيئتنا تحت ايدين ربنا ..

خللي بالك .. المحابس في ايديه..

بس حتي لو اتقفلت، غير طريقك و راجع ضميرك و صلح سلوكك ،
و اطلب وجه الله بأمانة، و مياه البركة ح تعود إلي مجاريها ..