مش هتقعد

[walaa farouk]

ماهو يانا يانتى ..
مش معقول كل شوية خلاف ..
انا ما بقيتش مستحمل حاجة منك تانى ..
مش ملاحق ع المشاكل ..

بصيت له بنظرة ثقة ولا كأن كلامه فارق معاها ..
بس كانت بتبص له بعتاب ..
وكأنها عايزاه يفوق ويرجع فى كلامه ..

حاولت تتكلم معاه ..
ودى وشه الناحية التانية ..
وقال لها معلش ..
فعلا مش قادر اكمل ..

ساعتها قررت ماتحاولش معاه تانى ..
وكأن كرامتها وصلت لمرحلة ..
ماينفعش تتهاون فيها اكتر من كدة ..

من جواه كان زعلان ..
وهو شايفها بتلم شنطها ..

بس كان جواه احساس تانى ..
انه عايزها تمشى ..
من كتر ما تعب منها ..
او زى ما كان بيقول ..
بسببها ..

بصت له ..
هو انت متضايق انى هامشى ؟ ..

عايزة الصراحة ..

بصيت له بأمل كأنه هيطيب خاطرها ..

قال لها بصراحة آه ..
وكنت مستنى اليوم ده من بدرى ..

حبست دموعها ..
ومالقيتش كلام ترد بيه ..

وزى ما يكون جواه بركان وانفجر ..

خلافات بسببك طول الوقت ..
قلق وتعب فى حاجات كتير ..
وارجع ادور الاقى ان انتى السبب ..
ياشيخة دانا جالى مرض بسببك ..

هنا نشفت دموعها بايديها ..
وبصت له ..

هو انت ليه بتتكلم كدة؟ ..
هو انت مش هتبطل طريقتك دى ..
بقالى شهور متحملة انك عاملنى شماعة ..
لكل حاجة وحشة بتحصل لك ..

والحاجات الحلوة ..
طبعاً انت بس اللى تاخد الكلام الحلو ..
وافضل انا اتفرج عليك ..

اقول طب هتقول انى ساعدتك ..
طب كنت معاك ..

الاقيك عمال تتكلم فى امجادك لوحدك ..
ووقت المشكلة ..
تشاور عليا وتقول .. هى السبب ..

يا اخى دانت شغلك الجديد نزلته بسببى ..
وهتفضل كل ما تتكلم عن اول يوم ..
تجيب سيرتى ..
ولا هتلغى اسمى كمان من الحكاية ..

تحب افكرك كمان؟ ..

استنى استنى .. معاكى حق ..
انا اسف ..
مش قصدى انكر كل اللى عشناه سوا ..
بس مش عارف ليه ..
كل مشاكلك قصاد عينى دلوقتى ..

بصت له بسخرية ..
وضحكت وهى بتكمل تحضير شنطتها ..

نفس اللى بتعمله مع كل واحدة ..
زى ما اللى قبلى مشيت وانا جيت ..
اللى هتيجى مكانى برضه هتقعد شوية وتمشى ..

وانت هتفضل تقول نفس الكلام ..

هاقولك كلمة ..
ومش هاخاف من رد فعلك ..

انت اللى غلط ..
العيب فيك انت ..
مش فيا انا ..

انت عايز تفضل واقف مكانك ..
والخير والفرح ييجى لحد عندك ..

رغم انى طول الوقت باسمعك تقول للناس ..
ياعم اعمل الخير انهاردة ..
هيترد لك اضعاف بكرة ..

وانت بقى ..
عملت الخير امبارح ..
عشان تشوفه معايا انهاردة؟؟؟؟؟

لو عايز اللى هتيجى مكانى تفرّحك
كنت عملت الخير وانت معايا ..
لو عايز اللى هتيجى مكانى تريحك
كنت عملت الخير وانت معايا ..

انا ماليش ذنب فى اللى بيحصل لك
انا اللى عليا باعمله ..
باديلك كل اللى عندى ..
مش بابخل عليك بأى دقيقة حتى ..
بس انت كل مرة تفضل تضيع وقت
وادينى اهو ماشية ..
وانت عمّال تقسى عليا بكلامك
عموماً .. اللى حصل حصل ..
خلاص مافيش وقت

بس ليا طلب عندك
اللى هتيجى مكانى ..
مالهاش ذنب فى اللى حصل معايا
ماتعاملهاش بنفس الطريقة ..
جرّب تغير الطريقة ..
ماتقعدش تفتكر الوحش اللى حصل معايا ..
وتحكيهولها ..

سيبها تجيب لك اللى عندها ..
من غير ماتحس انها المفروض تعالج اخطاء مش بتاعتها ..

حبها ..
هتلاقيها مالية الدنيا حواليك حب
اضحك لها ..
هتلاقيها بتضحك فى وشك علطول

لما خلصت كلامها ..
كان واقف قدامها مش لاقى رد ..
كل كلامها صح ..

جرى عليها وقال لها ..
انا عارف ان الاسف ..
مش هيرجع الايام اللى فاتت
بس اوعدك انى هاسمع كلامك بالحرف

فضلوا يتكلموا لحد الساعة ما قربت على 12 بالليل
وكان هو فى سابع نومة

قامت شالت شنطتها وراحت ناحية سريره
وشوشته فى ودنه وقالت له
انا ماشية خلاص .. ومش راجعة تانى
هتصحى تلاقى واحدة تانية مكانى
زى ماتفقنا بقى ..
وابتدت الساعة تدق 12
ومع اخر دقة .. كانت هى اختفت
صحى من نومه لقاها بتضحك له

قالت له اعرفك بنفسى ..
انا 2020
جايبة لك معايا ..
366 يوم تعمل فيهم اللى انت عايزه

ضحك لها وقال لها ..
وانا مش هاضيع يوم ..
من غير ماعمل حاجة تفرحنى وتفرحك
وابتدوا مع بعض قصة ..
لسة مش عارفين احداثها

والقصة دى هتبدأ معاك انت كمان ..

احنا فى اخر شهور فى السنة ..
خد قرارك من دلوقتى ..
وارمى البذور اللى هتقدر عليها ..

حاسب نفسك على كل اللى حصل ..
وكأنك بتقفل دفاتر السنة اللى فاتت ..

شوف انت كسبت ايه ..
وخسرت مين ..

شوف انت فرحت امتى ..
واتسببت فى زعل مين ..

شوف انت نجحت فى ايه ..
وأحبطت مين ..

م الاخر ..
شوف نفسك على حقيقتها ..

ساعتها هتعرف ..
فين البذور اللى محتاج تزرعها ..
وفين الزرع اللى محتاج تقلعه من حياتك ..