الجواز سترة

[walaa farouk]

الجواز سترة..
جملة بتتكرر... البت عاوزين نسترها يعنى ندورلها على عريس.
. او الجواز سترة.. او ربنا يفرحك و تستر بناتك.. منين قصة السترة دى
.. زمان من تقاليد الشرق للقديم كان إلقاء الرجل لردائه او شاله على فتاة
اعلان رغبته في الزواج و انها تدخل في كنفه او يقولك تحت عبايته.
. و هنا خد بالك لما بوعز سأل راعوث من انتى لانه كان الظلام باقي..
في اصل اللغة العبرى ما قلتلهوش انا "شبخا" اللى معناها الطبقة الدنيا من العبيد
و دول بلا حقوق لكن قالته له انا راعوث " أمتك" ..
أمتك تصلح ان تكون جارية او زوجة.. علشان كده ست الكل العدرا قالت هوذا انا أمة الرب..
. راعوث عاوزة تنفذ وصية نعمى و تقوله انه مسئول عنها و انه يسترها لانه ولى..
فقالت له انا أمتك.. يعنى ينفع ابقى زوجة ليك..
طرحت عليه فكرة انه يتجوزها ابسط ذيل ثوبك على أمتك لأنك ولى .
.و دى اللحظة اللى بيستناها ربنا من كل واحد فينا.. إن ناتى بارادتنا..
إن نعلن رغبتنا في ان ندخل كنفه.
. ربنا مش قهار بمعنى يقهرنى في علاقتى بيه.. يقرع.. تفتح.
. يدخل و يتعشى و يسكن.. لا ما تفتحش.. يظل يقرع و لا يقتحم.. عاندت لسنين
" حبيبي تحول و عبر عنى" علشان كده اغسطينوس قال
الله الذى خلصك بدونك لن يخلصك بدونك..
يعنى ربنا فدا البشرية كله بابنه يسوع الكلمة المتجسد..
كده الخلاص للعالم.. لكن علشان انا أقبل الخلاص ده لازم بارادتى..
لازم اكل من الخروف.. لازم أعلن رغبتى و افتح الباب و الباقي عليه...
طب ازاى اتجمل في عينه كعروس.. عجبته راعوث و طهارتها و قالها مباركة انتى
.. لا ميلتى على شاب غنى و لا فقير و كان ممكن تغويهم خصوصا هى وثنية
و يسهل اغراء الجسد.. لكنها عاوزة تنستر..
عاوزة جوازة و علاقة مثمرة تستمر مش طيش و استهلاك..
بخلاف كده فيه خمس وصايا قالتهم نعمى لراعوث تعملهم قبل ما تروح لبوعز
اغتسلى... دى معمودية محدش حيقدر ينستر بدم الصليب الا بالمعمودية و الميلاد التانى..
و الاغتسال كمان معناه توبة.. بللت فراشي بدموع التوبة.. اغتسلى... يعنى معمودية و توبة
تدهنى... المعمودية ميلاد جديد و التوبة ميلاد جديد..
ينفع بيهم ناخذ روحا جديدا اللى هو الروح القدس بمسحة الميرون بالدهن المقدس
و بالتوبة يتجدد الروح في احشائى بعد ما انطفأ بخطيتى
البسى ثيابك.. ده استعلان بانتهاء فترة الحداد.. ملابس الموت.
. تلاقي لما بنت ابوها توفي او شابة صغيرة توفي زوجها تلبس اسود حداد
بس بعد فترة يقولوا لها فتحى و البسي فرايحى
خلينا نفرح بعريسك او يقولوا للشابة الصغيرة المترملة..
فتحى بقة كفاية كده.. لسة صغيرة.. لازم تشوفي حياتك..
لبس الترمل لبس موت.. و احنا من غير المسيح يتامى مترملين
.. لبس الزواج حياة.. انتم اللذين اعتمدتم بالمسبح قد لبستم المسيح
.. المعمودية معناها موت و دفن و قلعنا العتيق الميت
و لبسنا الحياة لبسنا المسيح فصرنا على صورته اللى هى الصورة الجميلة
اللى تعجب الاب السماوى اوى و قال عنها هذا هو ابنى الحبيب الذى به سررت..
انزلى إلى البيدر.. انزلى للخدمة.. مش شرط يعنى تخدم مدارس احد.
. لا البيدر ده الحياة.. بيتك.. عيلتك.. بناتك.. أولادك.. الناس اللى حواليكى..
ساعدى في الفرز بين الحنطة و الزوان..
طلعى الحنطة من النفوس و ساعدى الناس تطرح من حياتها الزوان..
كل واحد فينا فيه حنطة و زوان.. يا بخته اللى يلاقي حد يساعده يطلع الحنطة اللى جواه
و يطير الزوان من حياته..
متى اضطجع.. متى تمم الفداء خلاص.. متى آمنت بموته و قيامته لانه اضطجع..
لانه الحى الذى لا يموت.. ذاق الموت بالجسد ..
ادخُلِي وَاكْشِفِي نَاحِيَةَ رِجْلَيْهِ وَاضْطَجِعِي..
ادخلى معناها علاقة عمق اكتر و قرب اكتر.. اكشفي ناحية رجليه اكتشفي أسراره..
عند رجليه سر الصليب و الفداء.. عند رجليه سر الملكوت.. و اضطجعى.
. اقبلى موت الصليب معاه.. مع المسيح صلبت لاحيا... ارتاحى من الشقاء في الحياة
.. عيشي التسليم.. هو خلاص حيخبرك بما تعملين.
. يعنى هو حيقولك تعمل ايه في تفاصيل تفاصيل حياتك لو تحب
يبقي اللى عاوز ينستر..
يغتسل.. يتدهن.. يلبس ثيابا جديدة.. ينزل للبيدر..
يدخل إلى أعماق الصليب عند قدميه و يقبله معه و يستقر عنده..
و سمعونا زغرودة حلوة لاحلى جوازة من احلى عريس..😊😊
السترة ما فيش احلى منها و الجواز سترة ما فيش كلام.. بس الجوازة دى 😉😘