علي فكرة إسمك مكتوب

[walaa farouk]

دايما وانا بقرا في الكتاب المقدس بسأل نفسي ايه لزمة الاسماء الكتير دي
.. ليه مايبقاش الموضوع مختصر !

لحد ما قريت سفر نحميا ووصلت لاصحاح ٣ واكتشفت حاجة غريبة
.. الشعب بيبني السور مع نحميا وكلهم مشتركين ومذكور بالاسم دور كل شخص .
. فلان وفلان بيرمموا الباب العتيق وفلان وفلان بيرمموا السور العريض
وفلان وفلان رمموا المدخل وفلان وفلان بيرمموا باب الخيل .. الخ

ولقيت ربنا بياخدني لاكتشاف رهيب ..
ان هو ده الملكوت ودول بناة الملكوت .. وهو مهتم جدا بإسم كل شخص بيعمل ولو دور صغير .
. ومفيش شخص في الملكوت مالهوش دور الكل له دور والكل إسمه مكتوب .
. وكل إسم مكرم وكاتب كتاب الملكوت مهتم جدا انه يذكر كل اسم ..
فإسمك مكتوب واسمي مكتوب في مرممين سور الملكوت ..

فيه اللي دوره يرمم منطقة فقراء .. وفيه اللي دوره يرمم خدمة كلمة .
. وفيه اللي دوره يرمم منطقة بناء جسور .. وفيه اللي دوره يرمم تعليم .. الخ

الكل مدعو للترميم .. والكل إسمه مكتوب
وصانع الملكوت مهتم جدا بيك وحاطط اسمك

لكن يا تري انت عارف دورك ايه ؟ هاترمم انهي جزء ؟
وهل لو عارف وصلت لحد فين ؟ الشغل ماشي كويس ؟ ولا متعطل ؟

يلا نرجع نرمم أسوار اورشليم
فالوقت مقصر والخراب عظيم