صلى اتسلح وحارب

[walaa farouk]

مفيش دعوه و صلاه اهم دلوقتي من ان ربنا يحفظ بيوتنا،
انه يسند الأساس عشان كم البيوت اللي بتنهار كترت قوي قوي،
كل يوم و كل دقيقه في حالات طلاق..

مفيش مصحه للنفسيه السويه و لجيل سوي زي البيت،
البيت اللي فيه اب و أم بيحبوا بعض
ده المكان الوحيد اللي ممكن يدي لطفل كل الأمان
و الحب اللي محتاجه عشان يقدر يصارع
مع كل اللي هيقابله في الدنيا.

ان طفل يصارع و يشهد انفصال ابوه و أمه
كأنه دخل حرب بيضرب فيها و مش عارف هيطلع منها ازاي.

محتاجين الستات ترجع تحارب عشان بيوتها
و متقبلش بالانفصال غير لو كان فعلا اخر باب.

محتاجين الرجاله تبقي أمينه و مسئوله
و تقبل انها تراجع نفسها و يرجعوا تاني أمان و شبع لمراتتهم.

هم الأتنين محتاجين يقروا و يتعلموا عن علاقتهم ..
احنا اتعلمنا عن الخط الاستوائي و زراعه القصب
و السافانا و الملك مينا و توحيد القطرين ده
و معرفناش يعني ايه جواز و ازاي نوحد شخصين.

نظريه ان في حاجه بتتصلح لوحدها
او أن الوقت هيصلح اللي اتكسر نظريه فاشله
لان لو عربيتك باظت و سيبتها يومين
مش هترجع تلاقيها اتصلحت لوحدها.
. فالجواز مش هيتصلح لوحده!

هي حرب فعلا،
حارب ان اولادك يعيشوا في سلام.
حارب انك تفضل قدوه .
حاربي انك تفضلي أمينه علي بيتك.
حاربي انك تتمسكي بعلاقه دافيه بجوزك .
حارب انك ترجع الشخص اللطيف بتاع الخطوبة
اللي كان بيعرف يفرح حبيبته.
حاربي انك ترجعي البنت الجميلة اللي كانت رقيقه
و مش بتتقمص بسرعه.
حاربي ان سمعه الستات متبقاش انهم نكديين و فوتي.
حارب ان سمعه الرجاله متبقاش انهم خاينين

و بيبصوا لبره و خليك أمين .

صلي.... اتسلح ..... و حارب