ما تطلبش غيرها

[walaa farouk]

أوعي ما تطلب حاجة غيرها .

البركة انك لما تعمل حاجة ما تضطرش تعيدها اكتر من مرة
و تضيع وقتك و طاقتك و فلوسك ..

البركة انك تلاقي اللي انت عاوزه في اقرب وقت و بأقل مجهود ..

البركة انك ما تدخلش في مشاكل تاكل من عقلك و قلبك
و صحتك و نومك و فلوسك ..

البركة انك لما تشتري تتوفق و ما حدش يضحك عليك ..

البركة أنك توصل مشوارك بالسلامة و ما تعطلش،
و لو حصلك حاجة تلاقيلها حل بكل سرعة ..

البركة أن ربنا يحط في سكتك ولاد الحلال،
فتخلص ورقك و مصالحك و مشاويرك من غير عقبات..

البركة أن ربنا يمتعك بالصحة
، و لو احتجت علاج يوفر لك الرأي الصواب و الطبيب الأمين..

البركة انك ترضي باللي عندك و اللي عملته و اللي اشتريته
، و ما تقعدش ندمان علي اللي مش عندك و نفسك تغيره
، او تحسد اللي حواليك علي اللي عندهم ..

البركة انك تنام مرتاح البال ، مطمن علي بيتك و مراتك وولادك ..

البركة أن شريك حياتك يحبك و يريحك ،
وولادك يبقوا في طوعك و ينجحوا في اخلاقهم و حياتهم الروحية و العملية ..

البركة أن الناس تحبك لوحدها من غير سبب
، و ان ما ميبقاش لك أعداء أو مقاومين
، و أن ربنا يحط في طريقك اللي يدافع عنك و يستر عليك من غير ما تطلب ..

هنا تيجي صلاة يعقوب الخالدة
«لا أطلقك إن لم تباركني»
، و صلاة يعبيص الرائعة "ليتك تباركني" .

[نرمين واصف]

امين،،مشاركة رائعة،،ربنا يفرحك ياولاء

[Mary Naeem]

البركة أن ربنا يمتعك بالصحة
، و لو احتجت علاج يوفر لك الرأي الصواب و الطبيب الأمين..

صح يا قمر
ربنا يباركك حببتي

[walaa farouk]

ميرسي على مروركم الغالى