سلم نفسك

[walaa farouk]

ربنا يقومك بالسلامة .انتى والمولود ..
انا رتبت حالى خلاص وهاسافر ..
الحِمل بقى تقيل عليا .. 4 بنات غير اللى فى السكة ..
والفرصة اللى فى الكويت ماتتعوضش ..سافر وماتقلقش ..
خلى بالك انت بس من نفسك ..وربنا يرزقك برزق ولادك ..

وشوية شهور يعدوا ..ونقرب من الولادة .. وييجى المولود ..
أخيراً ولد .. على اربع بنات ..انا واحدة منهم ..

كنا كلنا طايرين بيه ..وماما كانت عاملاه لعبتها ..
الفرحة اللى كانت فى عينيها .. كانت مختلفة ..
عشان احساسها بيه كان مختلف ..وتعلقها كمان بيه كان مختلف ..

يمكن كانت حاسة باللى هيحصل ..وكبر فادى .. واد زى العسل ..
ضحكته وفرحته .. كانت بتملا وتفيض على اللى حواليه ..

كل ده .. وبابا لسة فى الكويت ..ماشافوش .. ولا لمسه ..

وينطق فادى اول كلمات ..وتجرى ماما تجيب الكاسيت ..
ياللا نسجل شريط لبابا ونبعته ..وييجى عند التسجيل .. يسكت ..

انا عارف هو سكت ليه ..هو مايعرفنيش وماشافنيش .. هيكلمنى ليه ؟؟ ..
طب ماتزعلش .. بكرة ترجع وتشوفه ..ويكلمك ويتعلق بيك كمان ..

وتعدى شهور كمان .. وعيد ميلاده التانى ..وبرضه لسة ماشافهوش .. مافيش اجازات ..
او يمكن الخوف من المستقبل كان اكبروعشان الخال والد ..
يفضل رايح جاى بيه .. يلاعبه ويخرجه ..
عشان يعوضه اللى ناقصه ..لكن برضه لسة فيه حتة فاضية .. عند الاتنين ..
اللى هنا .. واللى مسافر ..وكام شهر كمان ..
ماما .. هو فادى سخن ليه كدة ..ايه دا .. اتصلى بخالك ..
ويوم طويل لف على الدكاترة ..ماحدش عارف فيه ايه ..
طب نصبر لتانى يوم عشان الخافض يشتغل ..وتانى يوم الحرارة زى ماهى ..
وياخده خاله تانى عند الدكتور ..يقلعه هدومه ويحطه فى مياه باردة ..

وأدوية تانى .. كملوا فى الخافض ..وابقوا اتصلوا قولوا لى ايه الاخبار ..

ويخرج فادى من عند الدكتور ..وخاله شايله ..
يفتح فادى عينيه بالعافيه .. ويبص له ..باى باى يا خالو ..

لا يا حبيبى ماتقولش كدة ..ويغمض فادى عينيه ..
ومايفتحهمش تانى ..وتنطفى اللمعة اللى فى عينين ماما ..
وتغيب الفرحة من حياتها ..ويبكى زى العيال الصغيرة ..
ازاى فادى يمشى وانا ماشفتهوش ..
انا حتى مالمستهوش ..يعنى انا عشان اشوفه .. لازم اموت ..
ماتقولش كدة يا بابا ..احنا محتاجينك ..

وتعدى شوية شهور ..انا شوفت فادى .. بييجى لى وانا قاعدة ..
ايه اللى بتقوليه ده يا ماما ..فادى مشى خلاص ..
لا انا باشوفه ..وييجى لها اخوها ..
ماينفعش اللى بتعمليه ده ..
ويلم صور فادى كلها من قدامها وياخدها ..

ومليون سؤال فى دماغى ..ليه يارب تاخده فجأة كدة ..
داحنا مالحقناش نلعب مع بعض ..دانا كنت عاملة حسابى ييجى معايا الكلية ..
ونطلع نتفسح سوا ..وكل ما تيجى سيرته قدام ماما ..
تتفتح فى العياط ..كأن اللى حصل كان امبارح ..

وتعدى سنين كتير .. والشوق جوايا يزيد ..عايزة اعرف الحكاية ..
طب ليه يارب تاخده مننا ..وشوية شهور تانى .. ماما حامل ..
اصل الديان .. ماينفعش يبقى مديون ..وتعدى الشهور بسرعة ..
وييجى العوض من عند إله التعويضات ..
واد صغير قمر ..وترجع الضحكة تانى لماما ..
واللمعة اللى كانت فى عينيها ..تاخد مكانها ..

وفجأة .. ايه دا .. بابا .. حمدالله على سلامتك
قاعد معانا اد ايه المرة دى ..

انا مش هاسافر تانى ..طب دا الشغل هنا مش حلو ..
مش مهم .. انتو احلى من اى شغل ..طب الفلوس هنا مش كتير ..
مش مهم .. انتو اغلى من اى فلوسانا عايز اصاحب ولادى ..
التلاجة المليانة .. مش هى اللى بتلم العيلة ..وتيجى الذكرى بتاعة فادى ..
قلت لنفسى .. يمكن السنين اللى عدت
تخلى ماما تقدر تحكى لى اللى تاه من دماغى ماما .. عايزة اعرف حكايته ..

وكأن اللى حصل كان امبارح ..ومن وسط دموعها ..
شاورت لى انها مش قادرة تتكلم ..
جريت على تيتا ..
إحكى لى انتى يا تيتا ..

ومع كل موقف كنت باسمعه .. كنت باعيط ..
على ذكريات كتير كان نفسى اعيشها .. وماعشتهاش ..
على مواقف كتير كان نفسى يكون معايا فيها ..ومالقيتهوش ..

لو كان فادى موجود انهاردة ..كان زمانه بقى فى الكلية ..

غصب عنى فضلت اعاتب ربنا ..ليه .. مش فاهمة حكمتك ..

صحيت فى يوم بالليل ..لقيت بابا صاحى بيتفرج ع التليفزيون ..

انت لسة صاحى ليه ..مش جاى لى نوم يا حبيبتى ..
طب تصبح على خير ..بوسته ودخلت نمت ..

وانا فى السرير بصيت لفوق ..وشكرت ربنا ..
احساس ان بابا موجود محسسنى بالآمان ..

صحيح يارب ..
لو ماكانش فادى مشى ..
ماكانش بابا رجع ..

انت بتسبب الاسباب ..
وبتملا مكان اللى غاب ..

وغمضت عينى ونمت وانا راضية ..
اللى انت عايزه يارب اجمل شئ يكون ..

الحكاية اللى فوق حصلت فعلا ..
وبتحصل كل يوم فى بيوت كتير ..

حكاية كل واحد مش فاهم ..
ايه سبب المشاكل اللى هو فيها ..
حكاية كل واحد اتحرم من حد ..
ومش عارف ايه حكمة ربنا من كدة ..

باستغرب من اللى بيسلم نفسه للجراح ..
ويقبل انه يتخدر بمزاجه ويغيب عن الوعى ..
عشان الجراح يعمل له عملية خطيرة ..
عشان يبقى احسن من غير ما يسأل ..
اصله مش هيفهم المصطلحات الطبية ..
اللى الدكتور هيقولها ..
لكن بيبقى واثق فيه .. اصله جراح شاطر ..

بس الجراح اقصى امكانياته .. انه يعالج ..
لكن الشفا مش من عنده ..

ونيجى عند ربنا .. الطبيب الاعظم ..
ونبقى عايزين نفهم ..
ونسأل .. ونطمن ..
ونتجرأ ونعاتبه على مشاكلنا ..
واللى احنا فيه ..الجرّاح كبيره انه يعالجك م اللى انت فيه ..
لكن اللى خلق الجراح ..
قادر يرجعلك اضعاف اللى كنت عليه .

[Mary Naeem]

ونتجرأ ونعاتبه على مشاكلنا ..
واللى احنا فيه ..الجرّاح كبيره انه يعالجك م اللى انت فيه ..
لكن اللى خلق الجراح ..
قادر يرجعلك اضعاف اللى كنت عليه .

مشاركة جميلة جدا
ربنا يبارك حياتك

[walaa farouk]

ميرسى على مرورك الغالى