اسكتش محاكمة جحش ( لأحد السعف )

[Marina Greiss]

ديكور محكمة (الميزان ، قضبان سجن)
(يظهر القاضي يرتدي بالطو أسود وبيده شاكوش وملف أوراق ويفتتح الجلسة)
القاضي: (يخبط بالشاكوش) هسس .. بس منك له ... هانفتتح الجلسة
الخادم : ممكن نستسمحك يا سيادة الرئيس نحضر الجلسة ؟
القاضي : هو المفروض الجلسة سرية لكن مافيش مانع خلاص تحضروا معانا بس بشرط
الخادم : خير ؟ إيه هو الشرط ؟
القاضي : تلتزموا بالتعليمات .. محدش يدخل في الحكم بتاعي ومتعملوش زيطة
الخادم: (ياخد رأي الأطفال ويوافقوا ) بس الأول نسمع الترنيمة دي (ترنيمة1)
القاضي : شكلكوا كده هتعطلونا ... يا منادي .. نادي على المتهم الأول
المنادي : المتهم الأول ... الجحش الغلبان
الجحش : (يظهر وراء القضبان ويقول ) ... أفندم
القاضي : ( يسأل الجحش ) في محامي جاي معاك ؟
الجحش : للأسف لآ .. أنا تهت من صاحبي .. بس هو لو عرف إني أنا هنا .. أكيد هايجي لي
القاضي : وإحنا مالنا ده مش موضوعنا
الخادم : ممكن إحنا ندافع عنه يا سيادة القاضي
القاضي : مافيش مانع .. وكيل النيابة يتفضل
وكيل النيابة : الجحش ياسيادة الرئيس.. متهم بأنه ساب مكانه اللي كان واقف فيه ومشي
الجحش : آه .. آه .. فينك يا صاحبي ؟ .. لا صدقوني محصلش الكلام ده .. هم اللي جم خدوني
القاضي : مين دول ال خدوك
الجحش : تلميذين من تلاميذ يسوع
القاضي : ممكن نعتبرهم شهود يا منادي نادي على التلميذين
المنادي : (ينادي ) الشاهد الأول .. التلميذين
(يدخل التلميذان ويقفوا أمام القاضي)
القاضي : (يسألهم) الجحش بيقول .. إنكم إنتوا ال خلتوه يسيب مكانه ؟
التلمذين : إحنا الرب يسوع طلب مننا إننا نروح .. ونفك الجحش ونجيبه
القاضي : وإنتوا أي حد يطلب منكم حاجة .. تعملوها كده ؟
التلمذين : لا طبعا .. بس ده السيد
القاضي : (يخبط بالشاكوش) .. أنا هنا السيد
التلمذين : إحنا بنتكلم على الرب يسوع .. أي حاجة بيقولهالنا أو يطلبها مننا .. بنفذها على طول
القاضي : إيه ده ؟ ...أنا قلت أنا هنا السيد .. طلعوهم بره بسرعة
(الخادم يتدخل ويطلب أن يتكلم إلى التلميذين)
القاضي : إتفضل ياسيدي
الخادم : (يكلم التلمذين) .. إنتوا إزاي أطعتم الرب يسوع بالشكل ده ؟ .. مخفتوش حد يقول عليكم حرامية ؟
التلميذين : إحنا لازم نطيع الرب يسوع .. مهما حصل طلما قال لنا على حاجة .. لازم نعملها ودايما هو مرتب لنا كل حاجة .. بدليل إنه قال لنا لوحد سألكوا .. قولوا إني أنا محتاج له
الخادم : (يعلق على موضوع الطاعة مهما كانت وترنيمة رقم2)
وكيل النيابة :واضح طبعا ياسيادة الرئيس .. إن التلمذين دول مجانين .. يعني مازال الحمار برضه متهم .. إنه ساب مكانه
الجحش : آه فينك يا صاحبي .. صدقوني .. هم اللي خدوني .. دول حتى قالوا لكم إن يسوع كان محتاج ليا
وكيل النيابة : (يضحك بصوت عالي) محتاج لك إنت ياجحش !! يعمل بيك إيه ؟؟
القاضي : آه .. ماهو ده ال ناقص .. إن الجحش يكون في حد بيحتاجوا .. ده إنت حتى محدش كان ركب عليك قبل كده .. يعني معندكش خبرة تشيل حد على ظهرك
الجحش : صحيح .. عمري ما كنت شلت حد .. لكن الغريب إنه ده ال حصل .. شلت يسوع على ظهري ومشيت بيه
وكيل النيابة : ووقعته طبعاً
الجحش : لا .. لا.. بالعكس
الخادم : عايزة أقولك ياجحش .. إن كل واحد فينا ممكن يكون في نظر نفسه ملوش قيمة .. لكن وجود يسوع في حياتنا يدينا قيمة .. وأهمية كبيرة (ترنيمة رقم 3)
القاضي : الحكاية كلها كده مش داخلة دماغي
الجحش : آه .. فينك ياصاحبي .. طب أقول لك ياسيادة القاضي .. إسأل حتى حد من الجموع ال كانت بتهتف
القاضي : يامنادي .. نادي على الشاهد التاني ... حد من الجموع
المنادي: (ينادي على الشاهد التاني) .. واحد من الجموع
(يدخل واحد من الجموع ويقول : أفندم)
وكيل النيابة : إنت تعرف الجحش ده ؟ .. شفتوا قبل كده ؟
واحد من الجموع : مش واخد بالي .. طيب فكرني كده ؟
الجحش : آه .. ياصاحبي .. أبوس إيديك تفتكر
القاضي : الجحش بيقول إنه كان راكب فوق ظهره يسوع ... لما كان داخل اورشليم .. وإنتوا الجموع كنتوا بتهتفوا
واحد من الجموع : إفتكرت .. إفتكرت .. فعلا يسوع دخل أورشليم .. وكلنا بنهتف أوصانا لأبن داود .. أوصانا في الاعالي .. وخلعنا ثيابنا .. وحطيناها تحتيه والزعف كمان
وكيل النيابة : (وهو منفعل جدا) .. الكلام ده مش صح .. دول هما .. هما الجموع ال كانوا ساعة ما يسوع إتقبض عليه بيهتفوا ويقولوا .. اصلبوه .. اصلبوه ..
القاضي : (يوجه كلامه لواحد من الجموع) .. إتفضل إنت إمشي .. أما حكاية غريبة ... نفس الجموع ال هتفوا ليسوع أوصانا في الأعالي .. هما هما اللي هتفوا ... إصلبوه إصلبوه .. أنا مش مصدق !!
الخادم : (يعلق على المشهد السابق) عاوز أقول لأصحابي .. إن إحنا كمان كتير بنعمل كده .. جوه الكنيسة بنصلي ونرنم ونعطي يسوع كل المجد .. وبره الكنيسة .. ننسى إن إحنا أولاد الله اصلا .. ونضرب ونشتم ..... (ترنيمة رقم 4)
وكيل النيابة : ياسيادة الرئيس الجحش ده متهم بكذا تهمة ... وأطالب باشد العقوبة عليه
الجحش : آه .. فينك ياصاحبي ... مين هاينقذني ؟؟
الخادم : معلش .. ياسيادة القاضي ... الجحش ده غلبان .. سامحه
القاضي : الحكم بعد المداولة ..(ويخرج وبيده ملف الأوراق)
الخادم : ماتخافش ياجحش .. إن شاء الله خير ... تعال قول معانا الترنيمة دي( ترنيمة رقم 5)
القاضي : (يدخل وبيده ملف الأوراق)
الخادم : ياترى ياسيادة القاضي .. النطق بالحكم دلوقتي ؟
القاضي : حالا ... حكمت المحكمة حضوريا على المتهم الجحش بال...
الجحش : آه .. ياصاحبي .. قول ياسيادة القاضي .. قول
القاضي : حكمت المحكمة حضوريا على المتهم الجحش ... بال ...
الخادم : ها .. قول بقى .. وقعت قلبنا في رجلينا
القاضي : حكمت المحكمة حضوريا .. على المتهم الجحش با......
الجحش : آه .. يالهوي .. ياخرابي .. ياخراب بيتك ياجحش
(وفجأة يظهر صاحب الجحش ويدخل جري )
صاحب الجحش : جحشي .. حبيبي .. مالك يا حبيبي ؟
الجحش : إيه ده ؟ .. إيه ده ؟ .. صاحبي إنت جيت ؟ .. أنا ضعت .. رحت في داهية
القاضي : إنت مين ياراجل إنت ؟ .. وعايز إيه ؟
الجحش : هو ده صاحبي ال قلت لكم عليه
صاحب الجحش : ياسيادة القاضي .. الجحش ده غلبان
القاضي : بس خلاص الجحش ده ... عليه حكم ولازم ينفذ الحكم
صاحب الجحش : حكم ليه ؟ .. هو عمل إيه بالظبط ؟
القاضي : ساب مكانه .... وراح مع ناس أغراب عنه ... بيتصرف من دماغه ... من غير ما ياخد تصريح من حد
صاحب الجحش : إزاي ... أنا صاحبه ... ولما شفت التلاميذ بيفكوه ... سألتهم ... فيه إيه ؟ .. بتفكوا جحشي ليه ؟ ... ولما عرفت منهم .. إن الرب محتاج له ... ماصدقتش نفسي ... إن الرب يسوع يكون محتاج جحشي ... ووافقت على طول إنهم ياخدوه
القاضي : يعني إنت كنت عارف ... يعني الجحش راح معاهم ... بعد ما أخد إذنك
صاحب الجحش : أيوه طبعا ... ده جحش طيب وغلبان ... ودي أول مرة حد يركبه ... يابخته .. إن الرب يسوع هو أول واحد يركبه
القاضي : آه .. إذا كان كده ... يبقى في الحالة دي الحكم ها يتغير ... مادام صاحب الجحش كان على معرفة ... بخط سير الجحش بتاعه ... إذا ... حكمت المحكمة ... براءة الجحش من التهمة المنسوبة إيه ... رفعت الجلسة
الجحش : الحمد لله ... الحمد لله ... شكرا ليك يا صاحبي ... جيت في الوقت المناسب
صاحب الجحش : الحمد لله ... ياللا بينا بقى يا جحش نروح ...
الجحش : ياللا بينا ... (ترنيمة رقم 5 )

ترانيم مقترحة:
1- خليك كدة إنسان أمين قول الحق – عندي حكاية هأقولها للأولاد – الرجل العاقل – رجلك اليمين
2- ماشي انا ماشي انا – كل خطوة امشيها معاك – الرب معايا ان مش قلقان – عيني عليك أنا عيني عليك
3- أنا يمكن أكون صغير – إحنا نجوم – أنا طفل صغير لكن مش هو ده الموضوع – معنديش كل المواهب
4- علمني أكون مسيحي حقيقي – في ناس بتحب الضلمة – مين ساكن في قلبك مين – إن كنت تحب يسوع
5- لو يسوع في مركبي أنا – مين اللي و أنا زعلان – لأنك انت معايا – طول ما أنا ماشي يسوع ويايا

تأليف إيريني سمير - المنيا

[walaa farouk]

مشاركة جميلة
ربنا يفرح قلبك

[Ramez5]

ميرسي على الاسكتش الجميل

[Mary Naeem]

مشاركة جميلة جدا
ربنا يبارك حياتك