خرافات غير طبية بالمرة

[walaa farouk]

♣ اللبن بينزل على اليوم التالت ..........على فكره اللبن بينزل اول يوم عادى بس انتى حطى ابنك على صدرك بعد الولادة مباشرة ..

♣ الأعشاب بديل للبن الأم ..... لو كده كان ربنا عملنا ناحية تجيب لبن وناحية أعشاب و خلاص

♣ المولود بيترفع له سقف الحنك ......... يعنى هو ربنا عمل كل حاجه و ساب سقف الحنك ساقط يعنى؟؟ و بيترفع ازاى يعنى ؟؟ كدهوه

♣ الطفل اللى صدره تعبان لو حتى وصل للثانويه يبقى السبب انه متشفطلوش وهو مولود .......... قال يعنى شوية التشفيط دول فضلو واقفين فى زوره طول عمره طيب مينفعش يكون عنده حساسية صدرية مثلا !!

♣ الطهارة للذكور على سن الاربعين .......... طيب و 39 متنفعش ؟؟ كل مكان بدرى كل ماكان افضل .

♣ نعصر اللبن من صدر المولود علشان ينشف ؟......... بالعكس كده هيزيد و احتمال يعمل خراج كمان !! متسيبيه و تشوفيلك شغلانه تانيه .

♣ لو واحده معرفش مالها كده عدت عليكى وانتى بترضعى هتكبسك ولبنك هيقف ........... وده تأثير ايه يعنى الاشعة تحت اللولبية ؟..

♣ الللى بيعيط جامد يبقى متلوح و يتعمله اختبار البيضة .......... والبيضة بالذات هتعرف المكان اللى فيه الوجع و تفقش فيه ؟؟...... والله مانا رادد

♣ الصفرا تتعالج باللمبة البيضا النيون ............ الصفرا لها نسبة و اسباب كتير و موضوع طويل و لها درجات ومنها مايسبب الوفاة لو متعملهاش العلاج اللازم و احيانا بنضطر لتغيير دم الطفل لحدوث تلوث بالصفراء ..... برده نحطه فى لمبه بيضا و خلاص

♣ السرار بتاع المولود يترمى فى محل دهب علشان يطلع رزقه واسع ............ الرزق بيد الله ومصير الانسان مش متعلق على مكان رمى السرار خالص

♣ الطفل اذا خد جلسة هيتعود عليها و هيبقى مدمن(بكسر الميم) و البخاخة دى بتاعة الكبير و صعبة على الطفل ............. أبسليوتلى ياماما هو اللى عنده حساسية وبيحتاج الجلسات لتوسعة الشعب الهوائية المقفوله و البخاخه حلوة يا محيى (قفشات افلام )!

♣الطفل السخن مياكلش بيض ولا سمك ........... بالعكس اثناء الحرارة الجسم بيحتاج للبروتينات اكثر من الاوقات العادية

♣ ميرضعش اثناء النزلة المعوية ......... يعنى لا هنرحم ولانخلى رحمة ربنا تنزل ؟!! يرضع عادى و ياكل زبادى و سوايل و نشويات و تفاح مسلوق و موز مهروس و محلول الجفاف .

التطعيم لو معملش حرارة يبقى مشتغلش .......... مش شرط يعمل حرارة على فكره

♣ اللى متاخر فى المشى و الحركة 🏃يبقى عنده نقص كالسيوم .............. على فكرة فى اسباب كتيره و نخلى بالنا من المخ قوى قوى

♣ اللبن الجاموسى او البقرى يصلح للرضع ........... لا مينفعش الا اذا اذا كنت مفكراه طرزان ( بطن البيبي مش ذى بطن صغير البقر🐄 علشان ياخدوا نفس اللبن !! )

♣لو فطمتى الطفل هياكل ............ هتفطميه و هيبقى بطل اللبن والاكل مع بعض !!!!

♣ التسنين هو سبب كل الامراض من برد و حرارة واسهال و حمى و وووو .......... التسنين حلو و مبيعملش الحاجات الوحشة دى

♣ الحامل مترضعش ابنها ............... عادى على فكره ترضع ابنها لغاية اخر الحمل كمان و فى حالات محدده لغاية الشهر الخامس

♣ لو البيبي اتكرع وهو بيرضع اللبن ينشف ....... على اساس انه بيتكرع لهب من بقه !!

♣ اللى عندها سكر مترضعش و الا هتجيب السكر للطفل ........ بالعكس الرضاعة حلوة ليها و هتحسن الجلوكوز فى الدم و السكر مبتنقلش لا بالرضاعة و لا بأى طريقة أخرى السكر مش مرض معدى ياناس .

♣ مية البصل تتحط فى ودن الطفل التعبانه ...................
مية البصل لاتجوز لوحدها و لابد من وضع الخل معها و الله أعلم 😂

♣ الكمادات بالخل تنزل الحرارة ...... الخل ده توفريه للبصل و تعملى الكمادات بالماء الفاتر بس.

دمتم و اطفالكم سالمين

[Mary Naeem]

شكرا على المعلومات
ربنا يباركك

[walaa farouk]

ميرسى على مرورك الغالى