تكات وحركات لست البنات

[walaa farouk]

🌟🌟🌟🌟🌟🌟🌟
1•لما تقطعى الباذنجان قطعيه بالطول علشان ما يشربش زيت معكى وكمان رشى عليه ملح و دقيق ح ينزل ميته ومش ح يشرب زيت برضوه .
2•الجلاش علشان ما يبقاش نئ من جوه ادهنى كل طبقة بالسمن السايحة او سخنى السمن

ورشيها على الجلاش بعد ما تخلصيه قبل دخول الفرن ...برودة الجلاش وسخونة السمنة
ح تخلي الجلاش يتشرب السمن ولما تدخليها الفرن ح يكون الجلاش استوى من جوه.

3•لما تعملى الرز سواء بسمتى او مصرى عادى ...
لو بسمتى الكوب بياخد كوب ونص ميه لو مش منقوع ..انما لو منقوع تحتاج كوب وربع ميه .
اما الرز المصرى الكوب بياخد كوب ميه .

4•علشان البصل المحمر بتاع الكشرى والكشك ما يبقاش طرى رشى عليه نشا وحمريه .

..النشا مش بيطلع السوائل اللى فى البصل ويفضل ناشف ومتحمر ومقرمش .

5•وانتى بتعملى الحوواشى او العيش باللحمة حطى حزمة كسبرة خضراء ورشة كباب صينى و رشة جوزة الطيب حتخلى الطعم مميز والريحة تحفة .

6-لما تيجى تعملى اى حاجة فيها كاكاو او شوكولاته حطى ملعقة صغيرة قهوة ح تعطى طعم مميز جدااااا.

7•تكة تحفة فى الطبخ حاجة اسمها تحديقة ...
عبارة عن ثوم وقرن فلفل حامى او رومى وملح وفلفل اسود
وتدقيهم كويس وتحطيها فى اى طبخة بتعطى طعم تحفة.

8•علشان صلصة المكرونة تكون معكى حلوة وتخينة فى قوامها وانتى بتسلقى المكرونة تاخدى حبة من ماء السلق وتحطيها على الصلصة بتعطى قوام تخين للصلصة وطعم مميز .

9•علشان الملوخية تكون بعرق معكى ومتسقطش قطفيها بعروقها وكمان اغسيلها وتنشفيها وتخرطيها على طوال وده بقا فى الملوخيه الشتوى بس لانها مش بطعم ولا قوام الملوخية الصيفى .

10•التوم علشان تقشريه بسهولة انقعيه يوم كامل فى الميه الميه بتخلى القشر ينفصل بسهولة .