10 نصايح بسيطة لازاي تكون "gentleman" و تكوني "lady

[walaa farouk]

10 نصايح بسيطة لازاي تكون "gentleman" و تكوني "lady" في "زمن المهرجنات".

ابتدى يوحشني الشياكة و الاناقة الروحية (مش الظاهرية) فقلت اكتب البوست ده لعل نرجع لأصولنا الجميلة.

1. كلمات "قشطة" و "فاكس" و "بيئة" و "حلقلي" و كل ما يشبه هذه الكلمات بصراحة مش حلوة ابدا ابدا. الشتايم ممنوعة منعا باتا و لو بهزار. مفيش واحدة تقول لصحبتها "يا كلبة" و لا واحد يهزر مع صحبه يقوله "يا متخلف". افشات الافلام مش كلها تتقال... لو حاجة ظريفة فعلا و مناسبة و مفهاش عيب ممكن. اغاني المهرجنات اكترها بتكون كلماتها مؤذية قوي و لما بتشغلوها في الافراح بنبقى قاعدين حنموت والله. (يا ريت منحطش اغاني اصلا. تخيلوا فرح الناس فيه عارفين يسلموا و يتكلموا مع بعض عادي...تخيلوا.. يا سلام ♡).

2. احترم مواعيدك. لو قلت حتقابل حد الساعة 10 مثلا... حتحسب وقت المشوار ووقت اللبس و تزود 5 دقايق احتياطي و تبتدي تجهز من الوقت ده. لو عندكم اطفال حتزودوا الوقت الاحتياطي بحاوالي ربع او نص ساعة. لو لقيت نفسك حتتأخر بتبعت رسالة او تتكلم تقول للشخص "سمحني حتأخر ربع ساعة عن المعاد"

3. لما تكون مع حد اكبر منك ماتمشيش قدامهم. صوتك ميبقاش اعلى من صوتهم. متقاطعش. متستخدمش ايديك كتير و بالخصوص ممنوع تشاور بصابعك (بشوفها دي كتير قوي). متحطش رجلك نحيتهم. تحسس احتياجتهم و قدمها قبل ما يطلبوا. "اجيب لحضرتك مية" "حضرتك مرتاح و لا اجيبلك خدادية كمان؟"

4. في اي قعدة مع ناس الموبايل يبقى في جيبك او في الشنطة ميتفتحش. يفضل تقفل الانترنت. اي مكلمة مش ضرورية جداااااا ما يتردش عليها. معنى انشغالك بالموبايل ان الناس اللي بتكلمهم اهم من اللي انت قاعد معاهم. بتبقى حاجة تدايق جدا حتى لو مبينوش.

5. متتكلمش عن نفسك كتير...محدش بيحب المغتر... خليك متواضع. اسمع بتركيز. متتكلمش وحش عن الناس ابدا... (عدا عن ان الموضوع حرام، محدش بيثق في اللي كثير الشكوى من الناس.) متدخلش في اللي لا يعنيك. خليك طاقة ايجابية بلاش دايما شريط "الناس وحشة... البلد تقرف... الشغل يفرس".

6. الاخلاق مش للمظهرة ده طبع مستمر و بيكون بنية رضا ربنا. يعني اه؟ يعني مثلا احنا مش بس نقول حضرتك لوالدنا و لكن نقول حضرتك للبواب لو كان اكبر مننا و للموظف اللي بيقضيلنا حاجتنا. احنا مش بس نقدم الاكل بشكل حلو لضيوفنا... و لكن كمان للشغالة و للسواق. احنا مش بس نقوم من مكاننا لحد كبير من قرايبنا ... احنا نقوم في المترو لاي واحدة او اي راجل شكله تعبان و لو بسيط.

7. انا عارفة ان ناس كتير في مصر بتقول عكس اللي حقوله دلوقتي بس لما حد يديك هدية تفتحها قدامه مش تركنها (الا لو في ضيوف تانيين عشان متحرجهمش. في الحالة دي حتكلمهم بعدها و تشكرهم). بس لو لوحدكم تفتح الهدية و تشكر فيها و تبينلهم فرحتك بيها... بشياكة طبعا من غير مبالغة.

8. للرجال بالذات: اهتم بمظهرك و نضافتك دائما. و المظهر الجميل مش معناه قميص Tommy Hilfiger و شنطة michael kors.... خالص. معناه قميص نضيف مكوي و جزمة متلمعة و شعر متسرح و هدوم متناسقة و مناسبة للمكان و الزمان اللي انت فيه.

9. لا تغضب. اختار كلماتك كويس جدا وقت الزعل و اعرف ازاي توقف الناس عند حدودهم من غير ما تقول اي كلمة مش مناسبة. و افتكروا ان في كتير من الأحيان السكوت بيكون افضل رد.

10. كن مثقف. إقرأ كتب تطورك و تفهمك الدنيا. اتعلم من كل الناس مهما كانت مكانتهم الاجتماعية او سنهم.

علموا الشباب الصغير بالذات الكلام ده. ♡ و ختاماً اعرفوا ان الشايكة مش كلمات انجليزي بنرميها في نص الجمل. و لا لبس و دخلة بندخل بيها على الناس.... الشياكة و الاناقة انسان اجتهد ان يكتمل فيه حسن الخلق لوجه الله لا لسمعه او رياء.

منقولة <3

[Mary Naeem]

كن مثقف. إقرأ كتب تطورك و تفهمك الدنيا. اتعلم من كل الناس مهما كانت مكانتهم الاجتماعية او سنهم.
10 نصايح عشان تكون gentleman وتكوني lady