|
 |
 |
 |
|
رقم المشاركة : ( 1 )
29 - 01 - 2018, 10:41 AM
|
|||||||||||
|
|||||||||||
 انا يونان أووووى على فكرة . زمان كنا بنتعلم ان يونان ده النبى الهارب الخواف اللى مكانش عاوز يكمل رسالته ودعوته ومتعصب لأهله وجنسه وناسه . استووووووب بقى كده كفاية تقطيع فى الراجل ! ( مع الفرق ) هو انا لو جه دلوقتى ربنا قاللى روح لداعش وكلمهم عنى .. هاقدر أروح ! .. هاتاخدنى الحماسة والغيرة الروحية ! .. خالص ساعتها هاقول لربنا ياعنى سايب كل المسيحيين اهل بلدى المحتاجين كلمتك ومودينى أخر الدنيا لناس مش بشر اصلا وغالبا هايقتلونى قبل ما افتح بوقى .. تصدق يارب ان ليك طلبات غريبة وعجيبة . بس انا يارب لو سمحت كده مش موافقك الرأى ده .. هاسمع كلامك فى كل حاجة ماعدا الحتة ديه وصدقنى ده مش عند خالص ولا تعصب .. ياعنى هاتعمل ايه لو ماروحتش ؟ .. عادى هاهرب منك زى كل مرة لما كلامك مابيجيش على مزاجى .. وألهى نفسى بأى حاجة تانى ولا اقولك هاخدلى كام يوم استجمام فى رحلة ولا مؤتمر ولا مصيف فى السخنة بيقولوا الجو هناك اخر حلاوة . انت زعلان منى يارب ؟ اه شاكلك بيقول زعلان .. بس انا مش قادر اتكلم معاك حاسس انك مش هاتقتنع بكلامى .. ولا جايز تغضب عليا او تغصبنى اروح لداعش بالعافية .. عارف احسن حاجة انى هانسحب وانطوى فى قوقعتى .. هانام واعمل نفسى من بنها .. على فكرة قوقعتى ديه مريحة لا بكلم ناس ولا عاوز ناس ولا طايق اسمع صوت حد .. الدنيا تضرب تقلب وانا ابان قدام الناس فى سلام وهدوء ربانى عجيب .. وفى الحقيقة انا منفصل عن الواقع ومشاعرى متبلدة . بس انت مش هاتسيبنى كده انا عارفك يارب .. وانت عارف انى مابجيش فى الوقت ده غير لما تحصل حاجة تفوقنى .. موجتى مابتجيش غير على إرسال الزنقات .. وهاتبعتلى حوت لطيف .. سواء بقى الحوت ده كان ألم نفسى ولا جسدى .. انت هارش ملحتى وعارف انى اول ما بتضغط بصرخ واقول يارب .. " يارب انقذنى المرة ديه وهاتكون اخر مرة " .. " ده وعد ووعد المزنوق دين عليه " " صدقنى يارب انا توبت توبة نصوحة " . نفسى افهم بتصدق كلامى فى الوقت ده ليه وانت عارف انى هاسمع كلامك يوم وترجع ريما لعادتها القديمة .. وأعيد الكر والفر منك تانى .. طب يارب لأمتى هافضل يونان كده بعنادة وتعصبه وبمشاعر خوفه وانسحابه وشعوره بالذنب وإحباطه وبحماسه اللى بيضيع بسرعة ويرجع لقديمه اللى متعود عليه . امتى يارب هاتصلحنى ؟ .. للدرجادى انا حالتى صعبة ومستعصية .. انا مصدق جدا انى مافرقش عن يونان فى حاجة .. بس أرجوك يارب ماتسبنيش كده .. غيرنى من فضلك ولو الذوق مانفعش معايا غيرنى بالعافية .. انا موافق ♥ #انا_يونان 
|
|
29 - 01 - 2018, 11:52 AM
|
رقم المشاركة : ( 2 ) | ||||
|
† Admin Woman †
|
رد: انا يونان
امتى يارب هاتصلحنى ؟ .. للدرجادى انا حالتى صعبة ومستعصية .. انا مصدق جدا انى مافرقش عن يونان فى حاجة .. بس أرجوك يارب ماتسبنيش كده .. غيرنى من فضلك ولو الذوق مانفعش معايا غيرنى بالعافية .. انا موافق ♥ رووووووووووعة حببتي ربنا يفرح قلبك |
||||
|
|
|
29 - 01 - 2018, 08:35 PM
|
رقم المشاركة : ( 3 ) | ||||
|
..::| الإدارة العامة |::..
|
رد: انا يونان
ميرسى على مرورك الغالى  |
||||
|
|
 |
|
العرض العادي
