مش بتاكلي وتشربي عايزة ايه بقى ؟؟

Rena Jesus · رقم المشاركة : ( 1 ) 04 - 01 - 2018, 07:53 AM

مش بتاكلي وتشربي عايزة ايه بقى ؟؟

للأسف بعض الأمهات ربوا في عقيدة أبنائهم إنما طالما مراتك بتاكل وتشرب في بيتك
يبقى أنت كده راجل 100 100 وهي مالهاش الحق إنها تفتح بقها أو تشتكي من أي حاجة!!
لا صدقينى يا أمي ابنك كده مش راجل 100 100 ..
هو كده مافرقش حاجة عن زينب وفوقيّة

حضرتك لما بتربي قطة في البيت لو مالعبتيش معاها وطبطبتي عليها بتاخد جنب منك وممكن ماتكلش كمان
فلما تجوزي ابنك لبنت ناس لازم تفهميه انه يعاملها بالحسنى ويأكّلها حُبّاً مش تفضّل ولا جميلة منه
يأكلها قبل ما ياكل هو .. يطمن انها شبعت قبل ما يشبع هو ..
ولو قاعدين في مطعم وطبقها طلع وحش يحلف 100 يمين انه يديها طبقه وياخد طبقها .. دي الرجولة الحق وده الحب الصادق

ثم هي كانت قاعدة معززة مكرمة في بيت أهلها وبتاكل أشهى أكل ويمكن أحسن من الأكل اللي ابنك جايبه ..
لو هيتجوزها عشان يأكلها تغور دي جوازة وتغور دي زيجة
الست ليها حقوق أكبر بكتير من مجرد أكل وشرب
ليها حق انها تحس معاه بالأمان ..
وانه بتاعها بس وبالتالي هي في مأمن من غدر الزمان
ليها حق انه يكون في أحسن صورة شكلا ومضموناً وثقافة وفكراً وأخلاقاً
مش انا راجل مايعيبنيش غير التلاجة مليانه ولا فاضية ..
ليها حق تفضفض معاه ويحن عليها و يضحّكها من قلبها
ويطبطب عليها بقلب صادق حنون

الست بتحس الطبطبة الصادقة من حطة الإيد كتأدية واجب
الست أذكى من ابنك ألف مرة
ابنك بيتجوز عشان شكل اجتماعي وعيال .. و حياته بره البيت..
إنما الست بتتجوز عشان نفسها في حياه كاملة مُستقرة جوه بيتها

قوّمي ابنك وعلميه وفهميه ..
مش تقّويه على بنات الناس وتنزعي منه مقومات الرجولة الحق.
ولو لسه مُقتنعة ان الجواز بالأكل والشرب بس ..
يبقى بلاش تجوزيه بنات ناس ..
روحي هاتيله كلبة يربيها يأكلها ويشربها ويسيبها طول اليوم
وهي ان شاء الله هتهبره من كرشه

Mary Naeem · 04 - 01 - 2018, 11:29 AM

قوّمي ابنك وعلميه وفهميه ..
مش تقّويه على بنات الناس وتنزعي منه مقومات الرجولة الحق.

صح يا قمر

ربنا يباركك حببتي

walaa farouk · 04 - 01 - 2018, 11:54 AM

قوّمي ابنك وعلميه وفهميه ..
مش تقّويه على بنات الناس

ربنا يفرح قلبك

Rena Jesus · 06 - 01 - 2018, 08:06 AM

ميرسى لمروركم الغالى
مش بتاكلي وتشربي عايزة ايه بقى ؟؟