أمنت بأن النور مكانه في القلوب

[Rena Jesus]

كنت بنزل خدمه في قرى محافظات بالتحديد في بني سويف بيبا ..
داخلت بيت واحده تقريبا ف سن ال 80 سنه
المفروض اقول كلمه من الإنجيل و اشوف احتياجاتها ايه،
الست دي تحت خط الفقر قاعده في اوضه مفهاش بلاط وعلي الطوب الأحمر..
ابسط من البساطة
دخلت بقولها ازيك يا امي
قالتلي في نعمه يابنتي

في سري قولت فين النعمه دي ده مفيش اي شيء من آدمية الإنسان !
بقولها انا فرحانه اني بتعرف عليكي
لقتها بتقولي ياااه ده انا فرحانه اوي اني شيفاكي صحيح انا عميه لكن قلبي شايفك
انا اتصدمت
طبعا كان لازم اتعامل كأنه عادي ومحسسهاش اني زعلت عليها
قولتلها ده انتي اجمل ما شاف قلبي صدقيني
قالتلي يارب يخليكي يابنتي ويفرح قلبك ويعوضك

لقتها بتقول اللهم ارحمني انا عبدك الخاطئ
بترددها كتير
قولتلها قوليلي يا امي بتصرفي منين عندك اولاد بتعولك؟
قالتلي ربنا معطنيش اولاد بس عطاني الاجمل الستر يابنتي
انا عايشه في نعيم عايشه في ببركة ربنا عايشه في خيره
انتي عارفه يابنتي ربنا ده طيب وحنين اوي
عمره ما قصر معايا
بقولها طيب قوليلي ايه العلاج اللي ناقص عندك
قالتلي ربنا مبيستناش لما العلاج ينقص .. بيبعتلي العلاج قبل مايخلص مش بقولك يابنتي سترني

تاني اللهم ارحمني انا عبدك الخاطي
قولتلها شكلك بتحبي الآيه دي اوي
قالتلي ماهو انا خاطيه ... الوحيد اللي بدون خطيه سيدي المسيح
عارفه يا بنتي انا بصحة علي خيره وبنام في حماه
ده انا عايشه في نعمه كبيره اوي وقلبي تملي فرحان بيسوع ..
انا كنت بعيط وبكتم صوت عياطي عشان متسمعش
بس الحقيقه ان فعلا قلبها كان شايفني و قالتلي متعيطيش يسوع بيحبك وهيفرح قلبك
معرفتش اعمل اي حاجه غير اني اوطي ابوس رجلها و ايديها وراسها واخد بركتها
فضلت تقولي متغبيش عني تعالي تاني اوعي تنسيني قلبي فرح لما شافك
.....

ايه ده بجد وفضلت ماشيه بعتذر لربنا انا ازاي عندي كل النعم اللي ربنا رزقني بيها دي ومش حسه انا ازاي وحشه اوي كده
انا كنت رايحه اخدمها الحقيقه هي اللي خدمتني
كنت رايحه اقولها كلمه من الكتاب المقدس
هي اللي ادتني درس عمره مايتنسي
وقتها حسيت اد ايه انا وحشه و اد ايه بلوم ربنا ع حاجات ف حياتي مش حبها
وكنت دايما اقوله ليه يارب انا ف الحته دي
وافضل الوم و اعتب علي ربنا ..

وفضلت ماشيه اشكر ربنا ع البيت الجميل اللي انا في علي الأسرة نظري ع صحتي ع شكلي ع حب الناس
انا في نعمه كبيره بس انا اللي عميه مش هي
أمنت بأن النور مكانه في القلوب❤💙
طوبى للبسطاء لأن لهم ملكوت السماوات
طوبي للمساكين بالروح لأن لهم ملكوت السموات
حقيقي اولون اخرون واخرون اولون✋

[Ramez5]

ميرسى على الموضوع المثمر
ربنا يبارك خدمتك

[walaa farouk]

أمنت بأن النور مكانه في القلوب

ميرسي على الموضوع الجميل
ربنا يفرح قلبك

[Mary Naeem]

أمنت بأن النور مكانه في القلوب❤��
طوبى للبسطاء لأن لهم ملكوت السماوات
طوبي للمساكين بالروح لأن لهم ملكوت السموات
حقيقي اولون اخرون واخرون اولون✋
ربنا يباركك حببتي

[Rena Jesus]

ميرسى لمروركم الغالى