ابنك على طول عيان و تعبان ؟

[Rena Jesus]

ابنك على طول عيان و تعبان ؟ يخرج من تعب يدخل في التاني ؟! مش عارفة تعملي ايه ؟!! .. شوفي يا ستي
اول سؤال تسأليه لنفسك .. بتأكليه أيه ؟!
اشمعنى ؟! .. أقول لحضرتك ..

إنتي عارفة ان ممكن بالأكل بس ترفعي مناعة ابنك و تحسني قدرة جسمه على مقاومة الأمراض ؟! ..
النهاردة أنا جايبلك لستة الاكل اللي ممكن تعمل كده :

1. الزبادي:
وده لان الزبادي فيه حاجتين مهمين جدا ..
اولا : باكتيريا اللبن (lactobacillus) و ذي لقو ان ليها دور مهم جدا في الحماية من عدوى الجهاز التنفسي و النزلات المعوية ..
ثانيا : فيتامين دال : اللي ليه دور مهم جدا في مقاومة الفيروسات و ادوار البرد.

2. الثوم:
و ده لانه غني بعنصر مهم جدا و هو الزنك ..
(وما ادراك ما الزنك !!)
الزنك ده مهم لتصنيع كرات الدم البيضاء المسؤولة الاولى عن المناعة في جسم الانسان

3. الموالح :
البرتقال و الليمون و ده لغناها بفيتامين c اللي ليه دور مهم جدا في الوقاية من ادوار البرد و عدوى الجهاز التنفسي

4. فلفل ألوان :
و ده لانه غني بفيتامين c و كمان غني بحاجة تانية جدا و هي الكاروتين ..
اللي بتتحول في جسمنا لفيتامين أ الأساسي جدا للحماية من عدوى الجهاز التنفسي و الهضمي كمان

5. اللوز:
و ده لانه غني جدا بفيتامين E و العديد من مضادات الأكسدة اللي بتقاوم البكتيريا و الفيروسات

6. السبانخ :
فيتامين c - مضادات أكسدة بالاضافة للحديد كمان

7. البطاطا - الجزر :
كاروتين

8. شوربة الفراخ - الفراخ :
اجدادنا كتير جدا بيطلع عندهم حق ..
شوربة الفراخ فعلا من اهم الحاجات اللي بتقاوم البرد و ده لانها غنية جدا بفيتامين ب ٦ و حاجة تانية اسمها (كارنوزين) المهمين جدا لمقاومة الفيروسات و ادوار البرد

الام الشاطرة لازم تاخد بالها بتأكل ولادها أيه و تبقى عارفة ازاي ترفع مناعتهم ..

[Mary Naeem]

الام الشاطرة لازم تاخد بالها بتأكل ولادها أيه و تبقى عارفة ازاي ترفع مناعتهم

ربنا يفرح قلبك

[walaa farouk]

ميرسى على مشاركتك الجميلة

[Rena Jesus]

ميرسى لمروركم الغالى