الحبيب الخنيق

[walaa farouk]

السيكوباتي العاطفي

PSYCHOPATH بمعني ( لو الراجل بتاعك بيعمل الخمس حاجات دية فده معناه إنه سيكوباتي عاطفيا ) .. بس هو يعني إيه سيكوباتي عاطفيا ؟! .. الـ Emotional PSYCHOPATH (السيكوباتي العاطفي ) مش شخص مجنون أو شكله مبهدل، و مش واعي في حياته زي ما أغلب الناس ممكن تتخيل ، إنما هو شخص شكله عادي جدا و بالعكس ممكن يكون جذاب و عامل زي رشدي اباظة بس نفسيا مش طبيعي فبيتعمد يأذي الناس اللي حواليه، و من أشهر العلامات اللي في الشخصية ديه :

1- دايما هيخليكي تتخيلي إن كل حاجة غلطتك :
لما بتحصل أي مشكلة في أي علاقة بيكون المطلوب ساعتها مقدار كبير من المصارحة و التعامل الناضج مع المشكلة ديه، بس نظراً إن الشخص السيكوباتي في الغالب بيبقي عنده نسبة عالية جدا من النرجسية و الغرور بيلجأ لإسلوب غير سوي في اللحظات اللي زي ديه، و هو إنه يرمي المشكلة دايما و بشكل غير عقلاني علي شريكته .. فهي دايماً العامل الرئيسي "خراب الكون" !! منها بيكون رمي المشكلة علي حد، ففي وجهة نظره هو كدة عمل دور مهم في تحديد سبب المشكلة، "فبرافو عليه عبقري بسلامته ! ☺ و منها برضة علي مقدار الأنا اللي عنده فهو يا حول الله عايش مع واحدة سبب في كل المشاكل ديه، و مستحملها فكتر الف خيره !!! ☺
2- دايما بيشكك في نفسك :
هو هنا مش حيطلعك سبب المشاكل، إنما دايماً هيغالط في معلوماتك، و يهز ثقتك في نفسك و فكرك ! فمثلاً لو انتي شوفتيه غلط، و واجهتيه، حيقولك إنتي شوفتي غلط و فسرتي الموضوع بطريقة مش مضبوطة لدرجة إنه يوصل لحاجة اسمها الـ Gaslighting و اللي مقتبسة من فيلم اتعمل سنة 1938 بعنوان Gas Light و اللي بيتكلم عن قصة واحدة جوزها كان بيتعمد يطلعها قدام نفسها مجنونة، و بيتهألها حاجات، و بالرغم إن الحاجات ديه كانت حقيقة إنما هو كان بينكرها، عشان يثبت في عقلها فكرة انها فعلا مجنونة !! فالسيكوباتي دايما هيخليكي كائن معندكيش ثقة في نفسك، و المبرر إن كدة سهل يتلاعب بيكي زي ما هو عاوز، فيقنعك باللي علي مزاجه، و يخبي عنك برضة اللي علي مزاجه ..

3- كل حاجة غلطتك :
ممكن تبان النقطة دية زي الأولي بس في فرق ، هنا هو بيوصلك شعور مستمر بالذنب و التقصير، فهنا حتي و لو مفيش مشكلة و الدنيا كويسة إنما انتي دايما مكسورة و مهمومة عشان ممكن تعمل اللي عليكي أكتر !! فالشخص السيكوباتي ميعرفش كلمة " شكرا " للناس اللي بيحبهم .. فتحسي إنك في علاقة مفهاش أي تقدير ليكي.

4- بيتعمد يقطع كل حاجة جواكي :

في أي علاقة ممكن يحصل خلاف أو حد يضايق حد غصب عنه، بس مع الشخص السيكوباتي هو بيدور علي ايه الحاجات اللي تضايقك و يعملها، و المبرر النفسي ليه إنه يقدر يعمل أي حاجة ! فمفيش حاجة هو مش حيعملها عشان خاطر أي حد .. فمثلا لو انتي طلبتي منه ميعليش صوته عليكي في الشارع أو ميعملش حركة معينة بتجرحك قدام أهلك ، حتلاقيه كل مرة تنزلوا سوا بيخلق أي سبب تافه و يعمل اللي يضايقك و دايما في المبرر الوهمي المش منطقي اللي حيخليه يستمر في اللي بيعمله .. و تبقي إنتي بتسألي ازاي بيحبني و يعمل حاجة زي كدة ؟!؟ و الإجابة ببساطة إن السيكوباتي مش بيحب غير نفسه، أما انتي فاداة تحكم لنزواته و رغباته بين ايديه ...

5- دايما بيعزلك عن اللي حواليكي :
تخيلي بعد ما حد يعمل فيكي كل ده و غالبا كل يوم تنامي مهمومة و تعبانه حيكون عشان يضمن استمراريتك معاه لازم اهم حاجة يضمن إن مفيش حد تاني في حياتك ممكن يحتويكي أو حتي يكون في بينك و بينه أي تواصل ! فهو عاوز أداته اللي بيستخدمها حسب مزاجة تبقي تحت طوعه و سيطرته، و عشان يعرف يربطها لازم يكون في دافع و اللي دايما بيكون إنه هو الانسان الوحيد في حياتها .. فبيخسرك أصاحبك و قاريبك , يعزلك أي حد أو حتي أي نشاط بتحبيه عشان متلقيش غيره فتفضلي مدينة لوجوده و خايفة دايما يسيبك و تبقي لوحدك !! و الكارثة إن دايما بيعمل كدة، و يقنعك أنه فلان مش كويس و فلانة مش بتحبك، و هو بس اللي خايف عليكي و بيحبك !! و الحقيقة إن اللي بيحب حد بجد بيكون عاوزه ينطلق و يشجعه إجتماعيا و إبداعيا بس السيكوباتي بيتميز دايما إنه بيسجن اللي معاه و يقهره في زنزانة القمع و الخوف ..!

[Mary Naeem]

لما بتحصل أي مشكلة في أي علاقة بيكون المطلوب ساعتها مقدار كبير من المصارحة و التعامل الناضج

السيكوباتى العاطفى