بمناسبة بداية الدراسة و الأيام البيضاء اللي إحنا داخلين عليها إن شاءالله إليكم قواعد المذاكرة العشرون لصغارِك:
١-بادئ ذي بدئ عايزاكي تهدي خاااالص 😌😌
٢- جهزي قعدة للمذاكرة تكون مكتب او ترابيزة و كرسي وبلاش قعدة السرير ولازم يكون المكان رايق و نظيف✨✨✨
٣-إعقدي إتفاق مع ابنك أو بنتك إن الساعة او الساعتين اللي هتقعدوا فيهم مفيش آآكل 🍗🍕مفيش أشرب 🥛🥛مفيش تليفزيون 📺 مفيش بيبي
😂😂
٤-إهدي خاااالص...أكتر من كده و ربك بيزيح 😌😌
٥-قسمي الواجبات وحطي على المكتب الحاجه اللي هتخلصوها بس وبلاش كركبه ✨✨
٦-ماتديش اي فرصة للمشاوير بمعني أقلامك 🖊✏🖍مساطرك 📏📐اساتيكك وكل أسلحتك 📎🖇📚📒تكون جاهزة عشان لو بعتيه اي مشوار من دول في الغالب مش بيرجع 😂😂😂
٧-إعملي حسابك إنك هتكرري الجملة ٢٠ مره ١٥منهم مش مسموعين عشان في كائنات فضائية أو شئٌ ما بيمشي على السقف و واخد كل تركيزه🙄🙄🙄 ف نصيحة إبعدي عن ساحة المذاكرة أي أدوات حادة او صلبة 🔨🔨حقناً للدماء😂😂😂
٨-إهدي خاااالص...البني آدم على زعْله وصِحتك بالدنيا يا حبيبتي❤❤❤
٩-الحاجه اللي عِدْتي وزدتي فيها و ما دخلتش دماغه سيبيها لوقت تاني وشوفي موضوع تاني او غيري المادة لمادة تانية👍🏻👍🏻
١٠-الحاجه اللي تعصلج معاكي أوي استخدمي فيها وسيلة الثواب 🏆💰والعقاب يعني لو بذلت مجهود في المادة الفلانيه (اللي هي عاملاله مشكلة) و جبت سكور حلو هوديك الفسحة اللي اتفقنا عليها والعكس بالعكس.
١١-إياكي و المقارنة بفلان وكلمة فلان شاطر وانت خايب او عمرك ما هتبقى زي فلان...ما تهزيش ثقته في نفسه طالما انت متأكده انه عامل أقصى ما عنده مالوش ابدا لازمة الكلام دا💔💔⛔⛔❌❌
١٢-شوب الليمون بالنعناع بيهدي و إشربيه مشبّر وحطي فيه ورقتين نعناع اخضر اللون الأخضر بيهدي كمان😂😂😂
١٣-حاولي تكون قعدة المذاكرة لطيفة يعني قبل ما تتعصبي و تنهاري😡😡😤😤😤 عدي لحد ١٠...نظمي نَفَسِك...خدي بؤ من شوب الليمون بالنعناع.....قومي إغسلي وشك بشوية ميه باردة 🚰🚰لو كل المحاولات دي فشلت أعرفي إنه نصيبه كده بأه كفاياكي شرف المحاولة بس بشويش على الواد دا لسه صغير برده 👼🏻👼🏻
١٤-ياريت قعدة الهوم وورك تبقى منفصلة عن قعدة تحضير الدروس انت بتتعاملي مع بني آدم صغير وله طاقة استيعاب اكيد وخللي بين كل مادة ومادة بريك صغير يشحن فيه طاقته و يروح يعمل بيبي 😂😂😂
١٥- إهدي خاااااالص...خااااالص إهدي..
١٦- لازم تكوني مجهزة في دماغك أهداف لقعدةً المذاكرة و لو قمتي منها محققة ١/٣ الأهداف دي تبقي بطلة وكتر ألف خيرك👏🏻👏🏻👏🏻👏🏻👏🏻
١٧-إنت كمان ماتقارنيش نفسك بحد كل واحدة فينا ليها طاقة و ظروفنا مش زي بعضها...ما تجلديش نفسك كل شوية وتحسي إنك مقصرة لإن دي طاقة سلبية هتأذيكي وهتأذي ولادك بالتابعية❌⛔
١٨-مش عيب أبداً إنك تقولي مش قادره وتستعيني بحد سواء مدرس خصوصي او ابوه او خاله أو عمه أو حتى طائر اللقلق 😄😄 أياً كان ...مش مسابقة هي ولا بطولة ولا حد هايديكي نيشان في الآخر🏅🎖🥇
١٩- ياريت القعدة ما تخلاش من كلمات التشجيع و إظهار الرضا والفرحة بأداؤه لإن دا ليه أثر السحر على نفسية إبنك بالذات لو جه منك إنت.💯💯
٢٠-جددي النية كل مرة إنك بتربي إبن ينفع الناس ويكون عملك الصالح الممتد في الدنيا لما بعد عمرين طوال تسيبيها و مش هوصيكي للمره الأخيرة إهدي خاااااااااااااالص 😌😌😌😌
شوب العصير معاكي...أساتيكك مساطرك اقلامك جاهزين...أهدافك في دماغك...انطلقي على بركة الله وقلبي و ربي معاكي 🙏🏻🙏🏻🙌🏻🙌🏻🙌🏻😄😄😄😄
مع تمنياتي بالنجاح والتوفيق وتحقيق كل اللي نفسكوا فيه 😘😘😘
