المعالج السميع

[marit jesus]

المعالج السَمّيع
في رأيي إن الفرق الأهم بين المعالج الشاطر والمعالج القالب هي موهبة ما، موهبة ممكن تتعلم جزء منها طبعا، لكن صعب تؤديها أوتدّعيها. هي موهبة، أو قدرة، الاستماع.
القدرة على الاستماع النشط أو اللي الخواجات بيسموها Active Listening هي من المواهب الأساسية للمعالج النفسي.
هي استماع مش بس للكلام، إنما استماع لكل الأصوات اللي في الكلام، كل الشخصيات المشتركة في الجملة الواحدة، كل المعارف والمعلومات المؤسسة للجملة والكلام عموما. هي استماع للماكينات والتروس اللي شغالة واشتغلت في مصنع الحروف والتعبير عند الشاكي.
الاستماع هو استماع لألحان الأصوات، تغيير الأتوان والإيقاع؛ استماع لنني العين والوِش والجسم والصوابع.
استماع للسكوت.
استماع للمصادر كلها، واستماع لاستماع الشاكي نفسه.
الموهوب والخبير بيسمع الكلام اللي الشاكي سمعه زمان، يسمع حواره معاه، ومع مصادره وتجاربه.
يقدر يسمع العيان وهو بيكلم نفسه على سريره قبل ما ينام.
لو تصدقوا ممكن كمان يسمع الحوار الجاري في راسه، الخناقة.
يقدر يسمع الشكوى اللي غير الشكوى الجارية على اللسان.
طبعا الموهبة دي تحتاج عدم التأكد من كل ما سمعته، وتحتاج وقت لتأكيد بعضه ونفي بعضه. دا كمان يحتاج الاستماع لنفسك في ذات الوقت. يحتاج استماعك لمصادرك انت نفسك وتاريخك في تكوين الكلام، في سماع الكلام. يحتاج تسمع اللي قلته بنفسك كأنك بتسمعه لأول مرة، وتستغربه.
محتاج حوارك مع نفسك في نفس الوقت.
الاستماع الايجابي مش تمثيل إنك بتسمع ولا هزّ الدماغ.
الشاكي، لأنه أكتر واحد محتاج يتسمع بالشكل دا، بيحس باستماعك، بنوع استماعك وعمقه؛ دي من أهم الحاجات عنده، دي من أدوات شفائه، ومن طرق حكمه عليك وعلى المسيرة العلاجية كلها.
السماع موهبة،
الاستماع أهم من الحوار؛
وبالتأكيد مش هو القول والفلحسة والكلام الكبير والنصايح.

[Mary Naeem]

ربنا يبارك حياتك

[marit jesus]

ميرسى يامرمر على مرورك الغالى

[walaa farouk]

ميرسى على مشاركتك الجميلة

[marit jesus]

ميرسي على مروركم الغالى