لازانيا بالخضار صيامى

[Marina Greiss]

دى بقي انا شخصيا احبها اكتر من النوع اللي باللحمه حتى و احنا فاطرين . بس معلش مفيش معايير بالظبط يعنى لانى باطبخها بالبركه .

المقادير
شرايح لازانيا
برطمان الريحان اللي عملناه من شوية
زيتون مفروم . بس مش ضرورى للوصفه و ممكن تحطوا زتون صاحى لو تحبوا .
صوص مكرونه عادى . كتروا منه و ماتعملهوش تخين اوى .. خليه خفيف شويه .
طماطم متقطعه شرايح

الخضار :

ممكن تستعملوا اى خضار تحبوه : بسله، جزر، بروكلى متقطع صغير، فلفل اخضر ( متقطع حلقات ) ، كوسه متقطعه شرايح، بطاطا ( متقطعه شرايح رفيعه ) ، قرع ( يتقطع شرايح رفيعه ) ، ماشروم ( متشوح خفيف فى زيت و توم ) ، باذنجان ( اما مقلي او مدهون بزيت و يتسوى فالفرن شويه قبل ما يتحط فاللازانيا ) ، سبانخ ( تتسقط فىمية بتغلى دقيقه و تتشال .. تتصفى و ممكن تتفرم او تتحط بورقها صاحى )

انا شخصيا باحب اعملها بالباذنجان و الماشروم و الكوسه و القرع .


الطريقه :

+ شوية من الصلصه تتحط فى قعر الصينيه و فوقيها شريحة لازانيا
+ تتدهن شريحة اللازانيا بشوية صلصة ريحان
+ حطى نوع من انواع الخضار اللي هتستعمليها و رشي شوية فلفل اسود
+ شريحه تانى لازانيا و تتدهن بالزيتون المفروم لو هتستعمليه .. اوتتدهن ريحان تانى .
+ نوع خضار آخر و هكذا لغاية ما آخر طبقه تكون شريحة لازانيا .
+ لو هتستعملى القرع او بطاطا حطى مع الطبقه دى شوية صلصه .
+ الطبقه الأخيره حطى عليها حلة الصوص كلها . فوق الصلصه وزعى شرايح الطماطم و رشي عليهم فلفل اسود .
+ لو تحبى ممكن تحطى ورقة ريحان فوق كل طماطمايه . بس لازم تحطى زيت زيتون فوق البازيل .
تتخبز فى الفرن على حوالى 200 درجه لمدة نص ساعه تقريبا .