البنطلون حيفضل بنطلون

[walaa farouk]

من اسبوع اشتريت بنطلون وبلوزة البلوزة طلعت طويلة فقررت اقصرها والبنطلون مكنش طويل بس قلت هخليه قصير( بنتكور) علشان يليق علي البلوزة المهم انا غيرت في معالم البنطلون والبلوزة تماما.

النهارده رحت اخدتهم وقستهم واتصدمت ، شكلهم وحش جدا ومش لايقين علي بعض ، رغم انهم قبل التغيير كانوا روعة وفي منتهي الشياكة.

الترزي قالي كلمة حكمة,متغيريش ومتعدليش في حاجة مش محتاجة تعديل ، لو مش عاجباكي من الاول مكنتيش تشتريها.

وفجأة لمبة نورت في دماغي

احنا كتير بنعرف ناس وبيعجبونا بس جوانا لسان حالنا يقول لازم نعملهم شوية تغييرات او تعديلات زي مثلا هخليها تبطل صوتها العالي، هخليه ميخرجش مع اصحابه. حعلمه ازاي يلبس بطريقة معينة ،

المهم بعد الفاس ما تقع في الراس ، ولو نجحنا في التغيير ده بنلاقي ان اللي كنا عايزين نغيره بيفقد جزء من سحره اللي كنا شايفينه عليه ، بيتطفي ، لانه حاول يأيف نفسه علي مقاسنا والنتيجة برده مظبطتش.

ولقيتني بقول لنفسي مش اللبس بس اللي مش حعدل فيه ، لا ، كمان البني ادمين ، اللي مش عاجبك ، يبقي خلاص مش عاجبك ، عادي يعني ، مش استخسار هو ، مش عرض في سوبرماركت مستخسر تسيبه.

واللي انت عاجبه ، كمان مش محتاج يغير فيك او يزود عليك،حتبقي مالي عينه بنواقصك قبل مميزاتك.

-البنطلون حيفضل بنطلون
-البنتكور اشتريه من حته تانيه

[Mary Naeem]

واللي انت عاجبه ، كمان مش محتاج يغير فيك او يزود عليك،حتبقي مالي عينه بنواقصك قبل مميزاتك.
ربنا يباركك

[walaa farouk]

ميرسى على مرورك الغالى مرمر

[souad jaalouk]

[مورا مرمر]

ربنا يفرح قلبك

[walaa farouk]

ميرسى على مروركم الغالى