امتى بقى

[walaa farouk]

الأيام بقت صعبة ..
وكله بيتمنى الامان ..
وماحدش لاقيه ..

وانت رب الكل ..
الله الواحد .. الرحمن الرحيم ..
ملك الكل .. وضابط الكل ..

انت القادر على كل شئ ..
وفى ايدك تغير الحال ..
ولا شئ قدامك محال ..

ولأنك غنى .. هنطلب منك بكل ثقة ..

ابن آدم بقى رخيص ..
وبقى يبيع نفسه وفكره ..
للى يشترى بأعلى سعر ..
ونسى انه غالى ..
لأن أساسه نفخة منك ..

ابن آدم نسى ..
ان فرحتك يوم ما خلقت أول انسان ..
جينا احنا ودوسنا عليها ..
يوم ماقررنا ..
اننا ندين بعض ..
ونحكم على بعض ..

ابن آدم نسى ..
انك انت الوحيد اللى فى ايدك ..
انك تحكم علينا ..
لكن احنا عملنا زى آدم ..
عصيناك ..
وأخدنا دورك ..
وقررنا نحكم على بعض ..
ومش بس كدة ..
لأ داحنا قررنا ننفذ الحكم كمان ..

وبرغم اننا غلطانين فى حقك انت ..
لكن مالناش غيرك انت برضه ..
عشان انت اللى عارف خبايا النفوس ..

وبرضه هنتجرأ ونطلب منك ..
عشان خاطر كل واحد مكتئب وزعلان ..
سواء لظروف مرضية او لظروف نفسية ..

عشان كل واحد .. ظروف الحياة قسيت عليه
واللى حاسس بوحدة حتى فى وسط عيلته ..
واللى حاسس بوحدة ..
عشان ماباقاش فاضل حد من عيلته ..

عشان كل واحد عيان ..
ومرضه مأثر على نفسيته ..

عشان كل واحد محتاج شغل ..
وظروفه المادية صعبة
واللى بيشتغل وبيعانى فى شغله ..
سواء محاربات او اضطهاد من اى نوع ..

عشان كل واحد بيتعسر فى دراسته ..
او بقاله كتير مش عارف ينجح ..

عشان كل اللى نفسه فى طفل ..
واللى عنده طفل وتاعبه ..
واللى بيعانى مع طفل مريض ..
وامله فى الشفاء بعيد ..
واللى عنده ابن عنيد تاعبه فى تربيته ..

عشان كل واحد نفسه يرتبط ..
ومش لاقى الشريك المناسب ليه ..
وعشان كل واحد مرتبط ..
مش لاقى الامكانيات اللى تخليه يكمل ..
عشان اللى بيحب ..
وبيحارب عشان يحافظ على اللى بيحبهم

عشان كل يتيم منسى من اللى حواليه ..
وعشان كل فقير .. ماحدش شايفه ولا حاسس بيه
عشان كل واحد محتاج بس سقف يغطيه ..
واللى بس نفسه فى لقمة عيش طرية ..
واللى نفسه فى هدمة يحطها على جسمه فى البرد تدفيه ..

عشان المسنين اللى بيعانوا الوحدة والمرض ..
وبتحاصرهم ذكريات اللمة والعيلة ..
عشان كل واحد ماباقاش فيه حد فاكره ..
وعشان كل واحد حاسس بحزن ومش عارف له سبب ..

عشان كل حد فقد عزيز عليه ..
اللى فقد ابنه او مراته او ابوه او اخوه ..
واللى فقدت زوجها او بنتها او امها ..

عشان اللى نفسه فى صاحب وفى ..

وعشان كل اسرة مفككة .. وكل بيت فى طريقه للانهيار ..
وكل زوجين المشاكل بنت بينهم حاجز ..
وكل اطفال بيعانوا من اهمال اهاليهم

عشان كل نظرة انانية وحب ذات .. ممكن تضيع صاحبها

كل القلوب دى يارب ..
ماحدش سامع صوتها غيرك ..
وماحدش يقدر يرد على انينها غيرك ..
ورغم اهتمامك بأضعف مخلوقاتك .. من غير ماتطلب
وتوفيرك لكل سبل العيش ليها ..
لكن احنا كتير بننسى الحقيقة دى ..

حقيقة انك موجود ..
وقادر تبدل احوال كتير ..

بين ايديك يارب بشرية مريضة ..
مليانة تعب وغضب وكراهية ..
مليانة غل وحقد وحسد ..
مليانة ضغينة وسواد وقسوة ..

اتصرف انت فيها ..
لأن كل اعمالك خير ..

وطلب اخير ..

عشان خاطر البيت الكبير ..
اللى كلنا عايشين فيه ..

مصر ..

وانت اكيد عارف الباقى ..

أمين ..

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي على مرورك الغالى مرمر