ادخل جوه حزنها ما تمنعهوش .....

[Rena Jesus]

فيه إعتقاد عند أغلب الشركاء العاطفيين و خصوصا الرجالة ،
إن دوره تجاه شريكته في حالة مرورها بمشاعر سلبية هو تخريجها باي حال من الأحوال من الإحساس السلبي اللي هي فيه ..
فلو مثلا هي زعلانة لسبب ما في شغلها او تعبانة نفسيا بسبب أزمة ما في حياتها الخاصة فهو المطلوب منه ينهي الزعل او التعب النفسي ده بأسرع شكل ممكن و باي طريقة ممكنة !!!
و اللي للأسف ساعات بتتفهم غلط او بتترجم ان الراجل بيتعامل مع مشاعر زوجته انها بزرار أول ما هو يقرر يدوس عليه هي المفروض تقلب حالتها المزاجية و تنسي اي حزن او كأبة بتمر بيهم .. !

في مقالة بعنوان
The Best Marriage Advice from a Divorced Man
( أفضل نصيحة للزواج من رجل مُطلق )
و في نقطة تحت عنوان Allow your woman to… just be ..
بيقول الكاتب بكل إيجاز إن دورك في حياة زوجتك المتضايقة مش انك تصلح لها حالتها النفسية بكلامك عن الإيجابية اللي ممكن يتفهم أنه تبسيط لمشاعرها أو أن رد فعلك يكون بذل اقصي أمكانياتك عشان تتحول لمهرج لما تشكي لك عن يومها ! ..
أنما دورك الفعلي أنك توصل لها قد ايه انتا مستوعب اللي هي حاسة بيه ..
قد ايه انتا مرحب تمروا بيه سوا ..
قد ايه انتا فارق معاك تحكي لك و تعبر معاك عن كل اللي في قلبها !! ..
فأنتا سامع و مهتم ..
أنتا عطوف و مقدر ..
أنتا مش مخنوق و متكدر عشان حوارتها التافهة اللي ملهاش معني !!
أو مستجعل وعاوزها تخلص بسرعة عشان ترجع مراتك الفرفوشة اللذوذة ،
اللي هو في النهاية الهدف إسعاد نفسك مش مساعدتها هي !!

فساعات تعمد الراجل انه يخرج مراته خروج إجباري سريع من حالات الحزن او الإكتئاب بدون اي محاولة منه لفهم سبب مشاعرها او انفعالاتها ،
بيسجل إنطباع عند الست أنها عبء عليه !
و بيربي جواها زي سور عشان تمارس فيه أحزانها بصمت و خفا بعيد عنه ..
و ده بيكون بداية انهيار الإتحاد النفسي اللي بينهم ..
فالمفروض ميترباش عند الست خوف من التعبير عن اي مشاعر ليها عند جوزها ..
فهي مختارتكش عشان انتا أكتر واحد بتضحكها او أكتر واحد بتعرف تتكلم عن التنمية البشرية أو حتي أكتر واحد حكيم مستنية منه موعظة او نصيحة !
أنما أختارتك عشان وثقت فيك و صدقت حبك ..
أختارتك عشان أمنت بجد أنك قادر فعلا تسمع لصوت مشاعرها و تحس بكلامتها اللي مش عارفة تقولها ..

ففي النهاية لازم يوصل لحبيبتك ان ضحكتها أو وشها المبسوط مش هما دول هدفك الاساسي أنما حاجتك الحقيقة أنك توصل لاعماق اعماق كيانها و التعامل معاه بكل حب و فرح حتي و هي في أشد حالتها حزن و يأس ،
هو ده هدف اللي مستعد تعمل كل اللي عندك عشان توصله ...

[Mary Naeem]

لازم يوصل لحبيبتك ان ضحكتها أو وشها المبسوط مش هما دول هدفك الاساسي

في منتهى الجمال يا قمر
ربنا يباركك

[walaa farouk]

أختارتك عشان أمنت بجد أنك قادر فعلا تسمع لصوت مشاعرها و تحس بكلامتها اللي مش عارفة تقولها ..

ربنا يبارك خدمتك الجميلة

[Rena Jesus]

ميرسى لمروركم الغالى