للرجال فقط

[walaa farouk]

باقولك أيه..

لو عندك بنت بلاش تقلل من قيمتها وتقهرها من صغرها..
قضي معاها وقت وحسسها أنك بتحبها وفخور بيها..
علمها تلعب كورة وكوتشينة وتركب عجل كمان..
وماتنساش تشجعها تضرب عيال الجيران كلهم..

ولو عندك أخت صاحبها واخرج معاها..
وروح اشتري معاها هدوم وماتتكسفش..
وبلاش تحسسها إنها لو خرجت من غير سبع البرمبة هاتتوه أو تتخطف..

زميلاتك ف الدراسة وف الشغل احترمهم واحترم مجهودهم ف الدراسة والشغل (اللي غالباً أكتر بكتير من مجهود سعادتك)..
حاول تصدق أنهم ممكن جداً يكونوا أشطر منك بمراحل..
وأنهم مش موجودين ف مكانهم بس علشان يطروا القعدة علينا..
وأن كونك راجل ده لا يميز دماغك عنهم في شيء..

أما أي واحدة ماشية ف الشارع خليك محترم ولم عينيك عنها لأن حتى النظرات إياها بتجرح..

بالنسبة لزوجتك.. مممم.. طبعاً مش هاوصيك..
أنك تكون موجود ده مش كفاية..
لازم تكون بتعمل حاجة.. بتشجعها.. بتدعمها.. بتساعدها ف شغل البيت..
يعني جربت مرة تقوم بدورة الغسيل كاملة (غسيل/نشر/لم وتطبيق/دولاب ومكوجي)؟
جربها وأوعدك هاتروح تبوس إيدها على طول..
وبرضة تجيب لها هدية النهاردة علشان ربنا يستر عليك..

أخيراً أمك..
بصراحة الست دي أنك تحسسها ولو لدقايق أنها مش الجني اللي سهران على راحتك..
أنك تخليها تبطل تقلق ع الشحط اللي هو حضرتك..
أنها تكون فخورة بتربيتها ليك..
ده ف حد ذاته هايكون إنجاز كبير..
ومافيش مانع برضو أن بعد ما تزغطك تقوم تلم السفرة وتغسل المواعين..

[Rena Jesus]

ميرسى ربنا يفرح قلبك

[Mary Naeem]

ربنا يبارك حياتك

[walaa farouk]

ميرسى كتير على مروركم الغالى

[MenA M.G]

موضوعك مميز .. طرح رائع
ربنا يبارك خدمتك