كيف يستفيد الشماس من طقس أسبوع الفصح المقدس (أسبوع البصخة)

[Rena Jesus]

كيف يستفيد الشماس من طقس أسبوع الفصح المقدس اسبوع ( البصخة )



بقالك كام سنة بتحضر أسبوع الآلام في الكنيسة .. سنة .. سنتين .. عشر سنين .. أكثر ؟
طيب ، كويس خالص .. قولي بقى ، فاكر إيه اللي حصل أسبوع الآلام اللي فات،
و مدى استفادتك الروحية ..
هل هيعدّي أسبوع الآلام السنة دي كدا برضه ، لأ ... قول لأ ..
أسبوع الآلام السنة دي مختلف .. و شوية النقط اللي تحت دي هتساعدك ..
لو حابب فعلاً إنه يكون أسبوع أحلى و أجمل من اللي فاتت ..




بس ركز معايا كدا :

1- لو كنت من الشمامسة المحظوظين ، اللي مش عليهم مسئوليات في أسبوع الآلام
( زي توزيع القراءات / قيادة الترتيل / الكشافة / الخدمة في الهيكل / إعداد الكتب و مستلزمات الطقس .... إلخ )
فطوباك ثم طوباك ،
لازم تعرف إن الناس دي – عن اختبار شخصي- أقل ناس بيستفيدوا روحيًا و وجدانيًا إذا لم يكونوا على القامة الروحية العالية التي تؤهلهم لهذا ،
لذلك لا تسعى إنك تخدم أو تنشغل بهذه المسئوليات أو غيرها ..
و لو طُلب منك شئ أو أُمرت بأى خدمة من تلك .. نفّذ بطاعة و خضوع و محبة و تواضع و هدوء ،
أسبوع الآلام دسم جدًا و يا بخت اللي يركز في كل قراءاته و يا عيني على أي حد ينشغل بأي حاجة تانية ، لأن التركيز في الصلاة أهم شئ.

2- إحضر بصخات على قد ما تقدر ، إحضر كثير .. إفتدي الوقت،
خلص مذاكرتك أو دروسك أو محاضراتك و إطلع ع الكنيسة إقعد ذاكر لحد ما البصخة تبدأ لو الدنيا مزنقة معاك جامد في المذاكرة ..
خلص شغلك أو حاول تستأذن و إطلع ع البصخة طوّالي ...
هتحس بفرحة كبيرة جدًا و إن الوقت مليان بركة.

3- إختار لك أيقونة في الكنيسة ، ركز معاها لو عينيك مش في الكتاب ،
بدل ما تقعد تبُص ع الناس و ده بيعمل إيه و دي رايحة فين ..
عندك مثلاً أيقونة الصلبوت أو حتى أي أيقونة .. حتى لو أيقونة الميلاد !
تحدث إلى الله في الأيقونة و اشعر إنه بيكلمك في القراءات و الألحان و رد عليه بصلوات سرية و تأملات فكرية و مكتوبة ،
أو لو معاك صورة في الكتاب اللي في إيديك استخدمها ، هتعيش أوي أحداث أسبوع الآلام.

4- اجعل حركاتك داخل الكنيسة دائمًا هادية ، حتى لو إنطبقت السماء ع الأرض ،
حافظ على هدوء حركتك و ياريت لو تقللها قدر المستطاع و إوعاك تجري في الكنيسة زي ما أنا كنت بعمل ..
إتكلم بهدووووووووووووووووووء .. هتلاقي نفسك حالل فيها سلام قلبي لا تعبر عنه كلمات ،
و إفتكر دائمًا إن بطرس لمّا إندفع بغضب ليدافع عن المسيح عند القبص عليه ، المسيح وبّخه مع إن غرضه (غايته) الأساسي كان كويس إنه بيدافع عن معلمه.

5-(شيه إن رومبي )أو (تعيش و تصلي) أو (مبروك النعمة)
ثلاث جمل تقولها بعد ما تخلص البصخة أو القداس و متفتحش أي مواضيع لا فائدة منها و ما زاد على ذلك فهو من ........ (كلكم عارفين التكملة)

6- لو مش حافظ كل ألحان أسبوع الآلام ، قوم على حيلك أثناء الألحان حتى لو مش حافظ – خاصة لو إنت في خورس المرتلين و لابس التونية ،
بس بلاش تلغبط الشماس اللي جنبك ، لأن هو مش أحسن منك كتير، و مثبت اللحن بالعافية .. غمض عينيك .. إرفع صلاة ..
قول اللحن بقلبك و ربنا بيحبك تصلي بقلبك قبل ما يحب إنك تقول اللحن بفمك

7- هناك جناح خاص في جُهنم (سبيشيال سويت) مُعد للشمامسة اللي بيضحكوا في البصخة و مقضيها هزار مع الواد اللي جنبه ..
هو صحيح الحزن يكون ممزوج بالفرح في أسبوع الآلام من أجل الخلاص ..
لكن مش ده الفرح المقصود .. لو سمحت أجّل النكتة ليوم شم النسيم، الموقف اللي حصل و يفطس م الضحك و هتموت و تحكيه لصاحبك، إكتبه في ورقة عشان متنساهوش، و يوم شم النسيم طلع الورقة و إديله ،
لكن عشان خاطر المسيح، الضحك مُعثر جدًا .. مُعثر جدًا .. مُعثر جدًا

8- قراءة الإنجيل قديمًا كانت مقتصرة فقط على أكبر رتبة كهنوتية في الكنيسة (الأسقف – القس ... )
لأنه ببساطة عند قراءة الإنجيل يكون المتكلم هو شخص السيد المسيح له المجد ،
فلو قرأت الإنجيل (قبطي أو عربي) إفتكر إنك إنت دلوقتي تمثل حضور المسيح.

9- لو عارف القراءة التي ستقرأها أو المزمور الذي ستطرحه قبلها ، حضّره كويس قبلها في البيت .. اضبط التشكيل و الوقفات و وضوح مخارج الألفاظ في العربي ..
اضبط النطق في القبطي ، و لو في النبوات كلمة غريبة عجيبة نتيجة الترجمة ..
لو تقدر ترجع لكتاب مُعجم الكتاب المقدس أو أي تفسير بس موثوق فيه ،
عشان تفهم معنى الكلمة ، و لما تقرأ في البصخة تقول معنى الكلمة ، خاصة لو إنت رتبتك آناغنوستيس

10- الطقس مرن، الطقس وضع لأجل الإنسان و ليس العكس ،
إذا رأيت طقسًا يتم بطريقة خاطئة أو لا يتم ( عن جهل أو سهو) نبه المسئول عنها بمنتهى الهدوء و التواضع ... مرة واحدة ...
كدا إنت عملت اللي عليك، و لو لم تجد استجابة أو تعمد في هذا الخطأ ، لا تطلب من الرب أن تنزل نارًا من السماء و تأكل الأب الكاهن و المعلم و الشماس ..
لا يا حبيبي دي خدعة شيطانية مشهورة ، بتحارب الشمامسة الشطار في حفظ الطقس .. حفظ ..
خليك فاهم مش حافظ (الطقس مرن، الطقس وضع لأجل الإنسان و ليس العكس)
مفيش مشكلة ، القربانة هتتحول إلى جسد و الخمر هيتحول إلى دم المسيح،
صلوات الشعب هتقبل ، أما مخالفو الطقس فلهم من يرتب معهم هذه الأشياء
خليك في حالك ... خليك في حالك .. خليك في حالك ...
إهرب لحياتك و سلامك الداخلي .. ركز في المسيح و سيب اللي يتخانق ربنا يتولاه

11- أثناء الصلوات الفردية التي لا يصليها الشعب (صلوات الكاهن / طرح المزمور) .. بلاش تقول بصوت مسموع يشوش على من يقول أو من يسمع ،
لأ استغل وقت المزمور ده في قراءة كتاب تأمل صغير واحد بس
( دراما الصليب لأنبا مكاريوس – يسوع المصلوب للقس منسى يوحنا - ... إلخ)
قراءة نبوات و أناجيل الساعة دي بتمعن أكثر ، التأمل في كلمات المزمور ،
صلاة يسوع دي كلها حاجات حلوة جدًا و هتحس بيها بس لما تجربها.

12- خلّي صوتك يكون أقل صوت في الخورس علوًا و صراخًا ،
و كن آخر الكلّ في طابور اللقان و الزيت ، أقصد بلاش خناقات على مين الأول، خليك إنت في ملكوت تاني كدا، عايش في الكنيسة كأنك في السماء فعلاً ,,
بس بلاش عزومات و إتفضل حضرتك و لأ مينفعش لا يمكن .. و الكلام ده .. فيه ناس وراءك عاوزة تتحرك برضه.

13- لو إنت من الناس اللي حافظة ألحان كثيرة .. اشترك في الترتيل،
دي وزنة ربنا هيحاسبك عليها فلا تدفنها في الرمال،
خليك مُطيع لمن هم أكبر منك سنًا أو أكبر منك رتبةً .

14- خلى معاك دائمًا معاك نوتة و قلم و كتاب البصخة ،
و إكتب تأملاتك الشخصية و صلواتك و إنطلق من الكنيسة الأرضية إلى الكنيسة السمائية

15- استمتع في أسبوع الآلام بكل حواسك ، خلّي أذنيك تشبع بالألحان الجميلة ،
خلى عينيك تتمتع بالأيقونات و الطقوس الحركية، إملأ صدرك برائحة البخور و الحنوط ..
حس بإكليل الشوك و المسامير و الحربة، إجعل أسبوع الآلام هذا العام مختلفًا،
إنس كل ما يعطلك و إنطلق بروحك ، إشبع من طقس كنيستك العظيمة الخالدة ..
الكنيسة المقدسة اللي وضعت الطقس نمارسه على الأرض ، لكى يرتقي بنا إلى السماء ..
طوبى للإنسان الذي يفهم هذا الكنز

16- أخيرًا أذكرنا في صلاتك ، وإعرف أن الكاتب هنا هو أول من يقع في هذه الأخطاء السابق ذكرها ، لذلك صلوا من أجل أن يرحمني الله
و أتمنى يكون هذه الدردشة الخفيفة سبب بركة لكل الشمامسة و لكل الشعب بنات و أولاد

cpd

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسى على الموضوع الجميل رينا
ربنا يفرح قلبك

[Rena Jesus]

ميرسى لمروركم الغالى