من أخطر الأخطاء الإجتماعية المشهورة.

[marit jesus]

من أخطر الأخطاء الإجتماعية المشهورة. 👥
( لما تروح تركب قطر 🚆او مواصلات، وتلاقي العربية🚌 يدوب لسه متحركه من ثانيه واحده ).
ساعتها، بتشتم نفسك😡، وتشتم اللي وقفك في الطريق يسلم عليك😠، وتشتم السواق اللي مشي😩، وتشتم الحظ، وتشتم اخوك الصغير اللي ضيع لك الجزمة بتاعتك وضيعت دقيقة وانت بتدور عليها👊 .
تعالو بقي نناقش الموضوع ده، عشان نعرف نتعامل معاه بعد كده.
1. مافيش حاجه اسمها انت منحوس، انت بس اللي بتفتكر الموقف ده، وتنسي ان فيه مليون مره، لحقت العربيه قبل ماتتحرك ب 5 دقايق.
2. اوعي تقول منه لله فلان وقف يسلم عليا وعطلني. عارف ليه ؟
لأن انت برده اكيد هاتوقف حد تكلمه. وتعطله عن حاجه من غير ماتقصد.
3. في قانون الاحتمالات كل شيئ محتمل، فطبيعي انك كتييير تلحق العربيه، وبرده طبيعي انك اوقات ماتلحقش العربيه.
4. احنا مخنا متبرمج اننا ماننتبهش للحاجات العادية اللي بتحصل كل يوم طبيعي، عشان كده لما الموقف ده بيحصل، بيعلم في دماغك.
5. حرقة الدم اللي بتحس بيها دي، مالهاش اي لازمه، ( مش بس عشان مافيش في ايديك حاجه تعملها ) . لا . عشان طبيعي ان الحياة ماتمشيش علي هواك.
6. مش معناه ابدا، ان العربيه هاتتقلب بالناس اللي فيها، وان ربنا نجاك.
ممكن فعلا ده يحصل، بس غااااالبا مش هايحصل، كل الحكاية انك مش مكتوب لك تركب العربيه دي، ومش لازم يكون فيه سبب.
7. عادي جدا وبتحصل لنا كلنا ( ان العربيه تفوتك، ماتلاقيش الطلب بتاعك في المحل، ويقولك لسه خلصان من 5 دقايق، تروح مشوار وترجع من غير ماتخلص حاجه و...و...و...و...و... ) . ده طبيعي.
⬅ واخيرا. مش كل حاجه تحصل علي غير هوانا او توقعاتنا، تضايقنا، او تهزمنا.
تأكد ان الحياة مش هاتمشي علي هواك دايما.
فبلاش ( الأفورة في رد الفعل علي كل حاجه ).
وخد الامور ببساطه اكتر شوية.
وقول الحمد لله

[Rena Jesus]

الحمد لله
ميرسى ربنا يبارك تعب محبتك

[Mary Naeem]

ربنا يبارك حياتك

[walaa farouk]

ربنا يبارك خدمتك الجميلة

[MenA M.G]

موضوعك مميز .. طرح رائع
ربنا يبارك خدمتك