ليه الأطفال بيتصرفوا غلط ، يعني بيصرخوا ، يغضبوا ،يزنوا علي اي حاجة
اول ما الطفل بيعمل حاجة غلط الأهل بيبدوأ يأخدوا موقف من الطفل و لو الموقف ده اتكرر الموقف ده بيبقي اصعب و تبدأ العلاقة عدائية
لأن اول حاجة بتيجي في دماغنا انه عاوز بتصرف غلط ممكن عشان يضايقنا او عشان هو كسلان
بس ده مش حقيقي.
الطفل في معظم الأوقات بيتصرف غلط لأنه مش عارف يتصرف صح
عشان الطفل يتصرف بشكل مناسب يعني يتحكم في غضبه و يقبل اي تغيير في الخطط و يأجل طلباته محتاج يبقي عنده شوية مهارات زي مهارة حل المشكلات و المرونة
(يعني يقدر يغير من خطة للتانية بسهولة)
و كمان التحكم في الغضب
المهارات دي الطفل مش بيتولد بيها و لكنها بتتطور مع الوقت ذي الكلام و المشي
بس ذي ما مش كل الأطفال بتتكلم و تمشي في نفس الوقت ،
كمان الأطفال اللي اهلهم بيشتكوا من انهم صعبين و عندين بيتأخروا شوية في المهارات دي عن بقية الأطفال
طب ايه الحل؟
كل مشكلة مع طفلي هي فرصة لتدريبه علي هذه المهارات
الأول لازم افهم ايه السبب انه بيصرخ و يعيط غير انه عاوز يضايقني
مثلاً الطفل اللي كل كل مرة بيعيط كل مرة و هو مروح من اي خروجة حتي لو قعد كل الوقت اللي هو عاوزه ممكن يكون عنده مشكلة في المرونة و تقبل التغيير.
ممكن نكون محتاجين نفكره كل شوية ان الوقت قرب يخلص عشان يبقي مستعد و نكلمه عن الحاجات اللي هنعملها بعد كده
الطفل اللي بيخاف ينام لوحده فبيضايق اخته بالليل عشان ميبقاش في الأوضة لوحده مهما عقبناه مش هيبطل ،
يمكن محتاجين ندور معاه علي حلول تطمنه اكتر زي اننا نأخر ميعاد النوم و نولع النور في الأوضة
الطفل الصعب محتاجين نفهمه و نتعاطف معاه و نعلمه و نحتمله
ادي له أختيارات بس مش كتيرة
قللي الأوامر و الأنشطة المطلوبة منه
ادي له وقت أكبر لتنفيذ المطلوب منه
حاولي تعرفي الوقت الصعب من اليوم و حاولي الوقت ده يبقي المطلوب منه قليل جدا
الطفل الصعب محتاج وقت عشان يتعلم ،
ادي له وقته يتعلم و ادي نفسك وقت تفهميه
