فن قطع العلاقات !!

[Rena Jesus]

قطع العلاقات فن !!

فيه علاقات كتير في حياتنا بيجي عليها وقت ومدة صلاحيتها بتنتهي، والأسباب كتير، وكمان الطريقة اللي بتنتهي بيها بتختلف من علاقة للتانية.
يعني فيه مثلاً اللي بتنتهي بعد مواجهة حاسمة،
وفيه اللي بتفضل تتقطع وترجع كل شوية،
وفيه اللي بتنتهي في صمت من غير ما حد فيهم ينطق بكلمة!

وأياً كانت الأسباب اللي أدت لإنهاء العلاقات دي،
فأنا بشوف إن طريقة القطع دي فن:
إنك ماتجرحش الطرف التاني وإنت بتبعد... فن،
إنك تواجهه بعيوبه اللي أدت لإنهاء العلاقة من غير ما تحسسه بالذنب... برضه فن،
وإنك تقطع مرة واحدة بشكل حاسم... أكيد فن.

بس لو العلاقات دي كانت من الأصل مريضة،
والطرفين ماعندهمش النضج الكافي إنهم يعملوا علاقات صحية،
فطبيعي إن طريقة القطع تكون إستكمالاً لسلسلة العك اللي كان حاصل في العلاقة وأدى للنهاية دي،
وساعتها بقى هيبقى أقصى أملنا إنهم يقدروا يبعدوا بشكل نهائي لوقف نزيف الدم،
ومش بعيد نضطر بعدها نلم أشلاء جثثهم، اللي كانوا مكملين عليها، برغم كل الإساءات والإستخدام اللي بيبقى موجود في العلاقات اللي من النوع ده.

وعشان كده يُفضل إن يكون فيه حد بيساعدنا، عشان نقدر ننهي العلاقة بأقل قدر من الألم لينا وللطرف الأخر،وبـأقل خساير ممكنة،
وأنا شخصياً إحتجت لناس تساندني في كل مرة كنت بنهي فيها علاقة،
ومفيش مانع طبعاً إننا نلجأ لمشير أو معالج لو تطلب الأمر،
خصوصاً لو كنا بنعاني من الإعتمادية في العلاقات، ساعتها هنحتاج لمساعدة متخصصة عشان نقدر ناخد القرار ده، وننفذه برغم صعوبته علينا وعلى الطرف الآخر.

أنا عارفة إن البعض مننا عنده صعوبة في إنه حتى يقرر أو يعوز ينهي علاقات مؤذية في حياته،
فما بالكم بقى بطريقة تنفيذ قرار القطع، وعشان كده أنا بترجاك تلجأ لمساعدة،
عشان لو فضلت مكمل في علاقات مُسيئة مش مفروضة عليك،
مش بعيد إننا مانلاقيش حتى أشلاء ليك عشان نلمها،
ولو إنت مش قادر وعاجز، ففي قوة أعظم منك، بس ياريت تلجألها.

cpd

[walaa farouk]

صح يا رينا
موضوع جميل جدا

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى