ساعات مابفهمنيش

[روشا الفرفوشه]

ساعات مابفهمنيش
هو انا عاوز اموت و لا عاوز اعيش
هوه انا حتة هلفوت و لاملك قاعد بصولجانه علي ريش
ضميري ينام ايام و شهور و فجأة يصحي و يعمل لنفسي محكمة تفتيش
امبارح يفوت و انا ببص لبكرة بامل و ساعات اليأس يسجني في قلعته و اقوله يابكرة ما تجيش
مرة طامح.. مرة طامع.. مرة جامح.. مرة شاطح.. ومرة بيه في مطعم خمس نجوم و ساعات سنكوح ماسك في ايده سميطة و دقة علي كورنيش
فقير اتعاطف معاه.. و ده موجوع يا ولداه.. وساعات ابخل و السحت ما بديش
مش فاهمني.. انا روحاني و لا شيطاني.. شوية ناسك و شوية عابد و شوية ساقط و شوية ملحد ما يهمنيش
رومانسي.. اسرح في شجرة.. في عصفورة.. في وردة مكسورة.. في بنت اميرة بتنورة.. فارسها راح يبوسها.. يصحيها.. يفك سحرها.. يهمس في ودنها.. ما تناميش
انا ماضي و لا حاضر.. جبان و لا مغامر.. انا سطر و لا صفحة و لا اصلا قصة خايبة ما تتحكيش
انا مركب و لا شراع و لا مرساة و لا مرثاة.. انا دفة و لا بحار.. انا بخار .. و لا فنار ما يختفيش
انا عاشق.. انا غاضب.. ..متمرد.. شاكر.. انا ثائر علي دنيا ساذجة.. عايقة.. اجري علي حضنها.. الاقيه سراب.. و اول ما اوصللها تدور وشها ما تحضنيش
بهلوان... راسم ضحكته علي شفته بالالوان ..لجل ما يشوفش حد دمعته.. انسان.. و لما يسالوه مالك.. عزة نفسه تاخده.. كذاب في رده.. ماليش
مع انه عاوز يتهدهد زي رضيع.. عامل فيها شجيع.. موجوع بس صمته حارس.. ما يشتكيش
و اللي ما يقولش ااااه.. عمر ما طبيب يداويه.. راح يفضل في وجعته و انينه ما يتشفيش
انا واقف قدامك اهه بقولك.. بص عليا برحمتك.. ياللي اشترتني بالغالي ما تبعنيش
انا مش فاهمني طب انت فهمني او مش مهم انا افهم المهم انت فاهمني.. حاسسني.. طير مكسور الجناح.. بقسوتهم.. نزعوا منه الريش
طب اسندني.. ده انت طيب.. جنين من رحم المعاناة بيحبي .. حتقوله ليه ما بتمشيش؟!
شيلني علي كتفك.. احضني.. استرني.. ده انا قاعد علي بابك مستني.. مترجعنيش
نبيل شحاتة

[Rena Jesus]

جميله جدا
ميرسى ربنا يبارك تعب محبتك

[روشا الفرفوشه]

ميرسى على مشاركتك الجميله

[marit jesus]

ربنا يباركك

[Mary Naeem]

مشاركة جميلة جدا

ربنا يبارك حياتك