عملتي إيه خلاكي غير كل البشر
عشتي فين !! كلمتي مين !!
مين علمك !! مين حط عينك
على الطريق ؟ مين فهمك ؟؟
مين علمك حب الإله
مين كان معاكي في الطريق
و إنتى ماشيه لمنتهاه !!!!
طب كنتي حاسه بالقدر ؟؟
عملتي إيه خلاكي غير أي بشر
نعرف يا مريم قصتك
و إن الملاك جه بشرك و كلمك
لكن محدش غيرك كان هناك يقولنا
عادي إنك شوفتي الملاك !!
عادي إنه يكلمك و إنتى
بإيمانك واقفه ثابته هناك !!
و لا خوفتي ؟؟
طب فكرتي ؟؟
و لا القدير كان طمنك
و لا إنتي كان وطنك هناك
منتيش بشر !!!!؟
عملتي إيه خلاكي أعظم من البشر
إحكي يا مريم عن أم حامل
من غير ما يلمسها بشر !!
إحساس غريب !! أكيد رهيب
أرجوكي إحكي سرك عجيب
محتاج أعرف كل إللى كان
يعني إيه كنتي حامل
و في بطنك رب الأكوان !!!!
كان طفل شقي قالق منامك !!
و لآ هادي مريح بالك !!
قولي يا مريم كان إله و لا بشر
عملتي إيه خلاكي أطهر من البشر !!!!!
قولي يا مريم فهمينا
إحكيلنا حبه عن فادينا
عينك عليه طفل صغير بيتعلم
يحبي يقف يسند يحاول يتكلم
سرك عجيب مش قولتلك !!
كان وقتها قلبك لمين
إبنك حبيبك في الجسد
و لآ الإله إللى إتولد !!!
صدقيني إحترتلك
طب يوم خلص و كل و نام
و إنتى يا عدرا وقفتي تصلي
كنتي ساعتها تصلي لمين !!!!
لطفل كان زي القمر ؟
و لا لخالق كل البشر ؟
عملتي إيه خلاكي أسما من البشر
وقت هيرودس نورتي مصر
في رحله أغرب من الخيال
كانت محال !!
باركتي مصر و أهلها
و كل شبر في أرضها 💖
كان مين معاكي في السفر
و مين بيحمي من الخطر !!
إنتى يا عدرا بتحمي إبنك
و لا الرضيع كان هو سندك !!
إيمان غريب و حب عجيب
حتى في وقت الخطر ..
عملتي إيه خلاكي أقدس من البشر
لحد ما جه وقت الآلام
و إبنك حبيبك مات قصادك 😔
حاسس بقلبك و إللى فيه
كنتى عارفه كل حاجه
و عارفه إللي مستنيه 😔
بس كنتي وقتها قدام عينيه
مات قصادك و الكل نال الخلاص
بس إنتي قلبك كان خلاص 😔
إحكيلى عن فرحتك لما قام
و لما بارك جمعكم
و لما حل وسطكم !!
و لما عرف باقي الجموع و البشر
عملتي إيه خلاكي فوق كل البشر
و يوم نياحتك في سلام
جالك إبنك بيقول سلام
يلا يا أمي كفايه تعب
كفاياكي حزن و آلام ..
دلوقتي جه وقت
الفرح وقت السرور
كان حقك يا أمي
تعيشي ملكه في القصور 👑
و القصور جاهزه يا أمي
و مستنياكي تنوريها ..
و أخد روحك و صعد بيها
روحك يا مريم عايشه معاه
و جسدك اللى شاف النور
مدفون تحت شجرة الحياه
عرفنا عملتي إيه خلاكي غير كل البشر
شفاعتك يا أم النور تكون مع كل البشر
Nashaat nasr
