بركتها محسوبة

[walaa farouk]

اعلي مستوي من العطاء اللي "بسرور" (٢ كورنثس ٩) ،
و اللي مش مستني حاجة من حد
و اللي متأكد انه بيدي ربنا مش ببدي المحتاج ، و اللي بيدي بسخاء ..

لكن حتي لو اديت محتاج لأنك مكسوف منه
أو عاوز تخلص من زنه (و ده كتير بيحصل)
، أو خايف من عقاب ربنا (و ده مش صح)،
أو مستني مكافأة علي اللي اديته
(و دي مقايضة برضه مش صح)
،أو بتدي بشوية بخل (!!)
البركة محسوبة و متشالة لك في السما..

يمكن البركة مش زي الفرحان في عطائه، اقل شوية
، لكن ربنا بيحسبهالك في كرمه و حبه و سخاؤه ..

اللي بيدي يدي لربنا ، و هو ياخد و يتصرف
.. حتي لو اللي بتديه يستاهلش،
ما ياما ربنا ادانا و احنا ما نستاهلش..

الاستثناء الأول اللي بينصب و احنا اتأكدنا منه ،
لأنه بياخد حق المحتاج ..

و الاستثناء التاني انك تدي في العلن،
كده تاخد من الناس اجرك مش من ربنا (متي ٧) ..

و افتكر دايما انك بتدي ربنا من اللي سبق و اداهولك..
"لأن منك الجميع ومن يدك أعطيناك" (اخبار الايام الاول ٢٩)