مش مقياس ( قيس نفسك على تعاليم يسوع )

[walaa farouk]

شاول الملك .. صموئيل الأول 9

شاول رجل مفيش زيه ولا احسن منه في اسرائيل كلها، ومسحه صموئيل علشان يكون ملك على الشعب، من عيلة غنية، رجل طويل ووسيم، قوي جدًا، كل شعب اسرائيل فِرح لما الله اختار شاول يكون ملك عليهم .. دارت الأيام وابتدا شاول يبعد عن الله وعن وصاياه وبالنسبة له بقى المُلك والمملكة أهم من كلام الرب، لغاية لما جه الرب وبعت صموئيل لشاول وقاله ان الرب رفضه لانه مابقاش بيسمع كلامه وهيشيل منه المُلك! شاول كان شايف نفسه عمل حاجة بسيطة مش مستهلة ان الله يعاقبه عليها وياخد المُلك منه ..

مش مهم انت ابتديت مع الرب ازاي، المهم بتعيش ازاي معاه ...
فيه جملة مشهورة بتقول: " مش مهم البدايات، النهائيات هي الأهم "






راحاب .. يشوع 2

أول لما بنشوف اسمها بيجي في دماغنا ايه؟! .. على طول بنفتكر راحاب الزانية مع ان هي عملت حاجة مهمة جدًا وعظيمة لشعب الله، نجّت الجاسوسن اللي دخلوا عندها من حراس الملك اللي كانوا بيدوروا عليهم وكانت مُعرضة للخطر علشانهم، علشان بس صدقت ان الله مع شعب اسرائيل ووثقت في كلام الجاسوسين انها هتنجى هي وبيتها كله وكانت العلامة مجرد حبل هتنزله من الشباك ..

رغم انها وحشة وهي عارفه ده كويس إلا ان اللي عملته ده دليل وايمان قوى على ثقتها في اله اسرائيل ..





جليات .. صموئيل الأول 17

دايمًا يتقال عليه جليات الجبار .. هو فعلا كان جبار طوله حوالي 3 متر و20 سم ولبسه كان تقيل وكله نحاس وكان بيمشي قدامه واحد علشان يشيل بس الدرع بتاعه، وكان دايمًا شايف ان مافيش حد اقوى منه او يقدر يغلبه، ورغم كده جه داود وهزمه مش بس كده دا كمان قتله !!

الانتصار مكانش علشان شطارة داود لكن علشان ثقته في الهه اللي كان معاه وحماه من مواقف كتير قبل كده كانت صعبة، لما داود اختار يثق في الله ويسمع كلامه انتصر على جليات الجبار ..





جدعون .. سفر القضاة 6

جدعون كان أصغر واحد في بيت أبوه وعيلته مش بس صغيرة لكن بيقول عليها الذُّلى يعني أضعف واحدة بين الأسباط كلهم، وكان من كُتر خوفه يالخد القمح وينضفه في مكان مقفول ومحدش شايفه – واللي بيعرفوا في الزراعه عارفين ان القمح ده علشان يتنضف ويتشال منه القش لازم يبقى فوق تل عالي علشان الهوا يطير القش ويخلى حبة القمح لانها تقيلة فمش هتطير زي القش الخفيف – رغم كل ده جدعون اتشجع وبعد محاولات كتيرة مع ربنا ابتدى يصدق في الله انه هيقدر يعمل بيه انتصار كبير للشعب واختار يمشي سكة الانتصار دي، وقد كان .. حتى لو انت شايف نفسك قليل وصغير، لو صدقت في كلام ربنا اللي قاله هتعمل حاجات عظيمة زي جدعون..





بولس الرسول ( شاول الطرسوسي ) اعمال الرسل 9

شاول الطرسوسي وبعد مقابلته مع الرب يسوع بقى اسمه بولس الرسول، شاول كان مكتوب عنه انه بيهدد وبيقتل كل المسيحين واللي بيشهدوا عن يسوع المسيح والمشكلة انه كان فاكر ان دي الطريقة اللي بترضي ربنا هو فعلا كان عايز يرضيه، لكن الله كان ليه طريق تاني وسكة تانيه غير دي خالص، وبقى هو هو نفسه اللي كان بيقتل اي حد بيتكلم عن يسوع ضحي بحياته كلها علشان يسوع..




يسوع المسيح ..

الشخص الوحيد اللي ينفع نقيس عليه حياتنا وتصرفاتنا اذا كانت صح او غلط هو الرب يسوع، طالما احنا اختارنا نتبعه ونمشي وراه يبقى لازم نسمع كلامه ونعيش زي ما هو قايل، الحكم على الناس مش دورنا ومش احنا اللي المفروض نقول مين صح ومين الغلط، الله كاشف القلوب وعارف النوايا .. قيس نفسك على تعاليم يسوع مش على اي حد تاني

[Rena Jesus]

رووووووووووووووعه يالولو ربنا يبارك تعبك

[نرمين واصف]

.. قيس نفسك على تعاليم يسوع مش على اي حد تاني

راااااااااااااااااااااائعة ربنايباركك ويبارك خدمتك حبيبتي

[walaa farouk]

ميرسى كتير على مروركم الغالى

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسى على مرورك الغالى

[MenA M.G]

موضوعك مميز .. طرح رائع
ربنا يبارك خدمتك

[walaa farouk]

ميرسى كتير على مرورك الغالى