فنانين الفيس بوك

[walaa farouk]

مجرد رأي ..
• متصنفش نفسك شاعر او كاتب او مرنم .... الخ ، قدم اللي انت بتحبه وسيب الناس تصنفك بناء علي هي شايفاك ازاي
ولو الكل اجمع انك تبطل ، متبطلش طالما مؤمن بنفسك .. واللي بيتعب منك عليه انه يبطل يتابعك
الموهبه والفن مش ملك حد ، طالما انت حابب فلازم تقرا وتثقف نفسك وتطور من نفسك لحد ماتثبت نفسك ، وياما تلاميذ اتفوقوا علي اساتذه
• الأستاذ اللي شايف انه دايما استاذ ومينفعش حد يعدل عليه ، فده عمره قصير فنياً
• متستغلش نقط ضعف البنات او الشباب او اياً كان وتقعد تكتب عنها لمجرد انك عارف انها هتجمع لايكات .. الكاتب الموهوب بيكتب في كل المجالات ، مش في مجالات النحنحه بس
• اكتب اللي انت مقتنع بيه تماما وسيب كل واحد ينقي اللي يعجبه وياخده عبره في حياته
• خليك زي السوبر ماركت ، فيه كل حاجه وكل واحد بينقي منه احتياجاته
اكتب عن الحب ، عن الأزمات الاقتصاديه ، عن قلة فرص العمل ، عن السلبيات اللي بتشوفها من البعض ، عن علاقة الاباء بالابناء ، عن الضيقات ...... الخ
• مش معني ان بوست معين مجابش شير ولايكات كتير تقوم تمسحه ، دي وجهة نظرك وانت المفروض كاتبها نتيجة اقتناعك بيها .. مش لازم تكتب اللي يعجب الناس
• علي فكرة ، النجاح عمره مابيتقاس بعدد اللايكات والشير .. انت ممكن تكون من النوع اللي بيجيله عشر لايكات بس انجح واهم من اللي بيجيله الفين
طبيعي واحد عنده ربع مليون فولو ، لو كح وكتب انا كحيت هيجيله شير ولايكات بالعبيط
علي عكس واحد اصدقائه معدودين وبيكتب حاجات ليها وزنها واللايكات علي قد اللي بيتابعه
• بلاش تتغر في نفسك لمجرد انك جمعت نسبة فولو كتير نتيجة بوست حلو كتبته وسط مليون بوست كلهم عك بتصبحنا بيهم يومياً
• اياك تصنف نفسك احسن كاتب او ان كتابك او روايتك او ديوانك الأفضل هذا العام
مفيش لجنة جمعت كل كتب مصر وعملت استفتاء عليهم وقيموك انك الافضل ..
• كون ان الطبعه الاولي من كتابك تخلص في يوم وتاني يوم نتفاجئ ان كل المكتبات فيها الطبعه التانيه ، فده مش معناه انك عظيم في الفلاسفه وان كتابك عليه سحب جبار
ده معناه ان الطبعه الاولي كانت خمس كتب بس وان الطبعه التانيه كانت مطبوعه ومركونه لزوم الشووووو
انا بقالي شهر كامل مستني استلم الطبعه التاسعه من مرار طافح من المطبعه ولسه ماستلمتهاش ، عرفني بتطبع عند مين الطبعه كامله في اربع ساعات !!
• لو عملت ترنيمة او كتبت بوست معين انشره عندك ، وانا لو عجبني طبيعي هدخل واعملك لايك ولو عجبني اكتر هكتبلك كومينت ولو عجبني اكتر واكتر هعمله شير
• مفيش اي مبرر يخليك تبعتلي الحاجه في رساله علي الفيس بوك والواتس اب وتحطهالي علي بروفايلي وبعد كده تعملي تاج عليها وبعد كده تعملي مينشن في الكومينتات
انت كده عامل زي البياع الرخم اللي بيرمي المنتجات اللي معاه علي رجل الزباين في المترو ، مترخصش حاجتك بنفسك ، لاني ساعتها هبدأ معاك بالـ unfollow ثم الـ unfriend ثم الـ block
• بروفايلك ملكيه خاصة ـ حط فيه اللي انت عايزه حتي لو عايز تنزل صورة ليك من غير هدوم
لكن مفيش اي مبرر يخليك تعملي تاج علي صورة متخصنيش !!
• مش مقياس اطلاقاً ان فولان تنك لمجرد انه مش بيعملك لايكات علي بوستاتك
يجوز جدا مبتظهرش قدامه ، يجوز جدا بوستاتك مبتعجبهوش ، يجوز جدا يكون عاملك unfollow
• واخيرا ليك انت كقارئ ، أنقد أي كلام مش عاجبك ، وان كنت مكسوف تحرجه علي العام علشان انت انسان ذوق ، فماتتهاونش في انك تبعتله رساله توجهه فيها وتتناقش معاه
فيه انواع لو تكاثرت هتتعبنا اكتر ماحنا تعبانين

كلامي مش موجه لحد بالتحديد ، لكنه يجوز يكون مقاس ناس كتير

[Rena Jesus]

ميرسى ربنا يبارك تعب محبتك

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي كتير على مروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك