يعنى ايه تخلفى بنات

walaa farouk · رقم المشاركة : ( 1 ) 01 - 12 - 2016, 09:57 AM

- يعنى تستحملى عياط و زن متواصل بسبب و بدون
- يعنى تحضرى نفسك لكورس خناق 3 مرات يوميا على الاقل على تسريح الشعر
- يعنى تنسى حاجاتك الشخصيه لانها بقدره قادر بتتحول لدولابها, هتورثك بالحيا
..
- يعنى تأقلمى نفسك على قبول ضره معاكى فى البيت ,وقفالك على الواحدة و متابعه خطواتك و بتغير على جوزك و بتسعى لكسب وده حتى لو وقعت بينكم
- يعنى تنسى تماما كلمه حاضر و نعم تستعدى نفسيا و عصبيا لمجادلات سفسطائيه لا تنتهى
- يعنى تغتنى باى وسيله علشان تلاحقى على طلباتها
- يعنى تصدقى ان دولابها اللى مش بيتقفل مفيش فيه هدوم و درج التسريحه فاضى من التوك
.
- يعنى تسلكى بلاعه الحوض و البانيو اسبوعيا و تفضى كيس المكنسه بسبب شعرها اللى مسيباه علينا و بيسرحوه فى اى حته
- يعنى تفهمى ان اى قطعه ملابس بيفوت عليها اسبوعين بتبقى قديمه
- يعنى تكتشفى ان مش معنى ان عندها خمس بنطلونات جينز يبقى ده كفايه ...الجينز الوان و قصات و مركات مختلفه
- يعنى تسمعى بودنك انك قديمه و مش عايشه فى الدنيا و لا مواكبه الاحداث و تسكتى لان مهما قلتى مش هتغيرى حاجه
- يعنى متستغربيهاش لما تتكلم برقه قدام الناس مع انها فى البيت عايشه دور وائل جمعه
- يعنى متندهشيش لما تلاقيها بتعيط فجأه او تضحك من غير سبب ...اللى عليها جامد يا سعاد
- يعنى تطمنى خالص لما تلاقيها داخله معيطه من الامتحان لان ده معناه انها ناقصه نص درجه بس لكن لو سألتيها و قالت كويس و هى عوجه الشفه السفلى زغرطى لان ده معناه انها قفلت الامتحان
- يعنى لما تيجى تقول لك : ماما عايزاكى ثانيه واحده ...تقعدى لانها غالبا هتكلمك فى قضيه قرابه الساعه و مش هطول
- يعنى حسك عينك تسأليها عن عيد ميلاد صاحبتها الا لو كنتى فاضيه 3 ساعات متواصل لانها هتوصفلك شراب ابن خاله صاحبتها كان شكله ايه و هتقولك حواجب مراه ابن عم بابا صاحبتها كانت مرسومه ازاى
- يعنى اوعى تقولى على بنت جميله و الا هتلاقيها غلت فى نفسها و طلعت فيها القطط الفاطسه و يمكن ترتكب جريمه و بدل ما تشوفيلها عريس تدوريلها على محامى

- يعنى تلاقيها ميته طول اليوم و مش قادره تتحرك من مكانها بس صاحبتها تقول لها : تعالى نشترى حاجات من المول, تلاقيهم دبت فيها الروح و بتجرى فى الشقه ولا جمال الحبشه
- يعنى لو ناويه تاخديها معاك مشوار مهم تقوليلها قبلها ب48 ساعه على الاقل علشان يادوب تلبس

- يعنى تبقى مسلياكى بس فرساكى ...

البنات حلوين بس كيدهن عظيم ,

وعلى راي نانسي ..

اللى مخلفش بنات ,, مشبعش من الحنيه ولا داقش الحلويات

Rena Jesus · 01 - 12 - 2016, 02:39 PM

ميرسى ربنا يبارك تعب محبتك

Mary Naeem · 01 - 12 - 2016, 02:40 PM

مشاركة جميلة جدا

ربنا يبارك حياتك

walaa farouk · 02 - 12 - 2016, 08:32 PM

رينا
مارى
ميرسي كتير على مروركم الغالى