يوميات فايز وفايزه (متجدد)

[Rena Jesus]

= بقولك ايه قبل ما تنزل كده ..
اقفل الباب ده وتعالي عايزاك


- خير يا فايزه ؟


= اقفل الباب بس وتعالي

- ماشي .. نعم

= همممم

- لا ننجز في شغل وفي حياه


= انت بتتكلم كده ليه ؟

- انا آسف .. اتفضلي قولي

= انت لما صحيت من النوم ..
مقولتيليش ليه صباح الخير يا حبيبتي زي كل يوم ؟


- لا لا استني معلش .. معلش

= ايه ؟

- عشان بس عندي شغل ..
خليني ألخص الموضوع ده سريعا

= اتفضل

- احنا دلوقتي داخلين دائره الخناقة النكدية التقليديه ..
اللي هي بتبدأ من نقطة الصفر ..
اللي بتكون سبب خزعبلي يثير النرفزه جوايا عشان اتعصب

= اه


- بعدها بنخش المرحلة التانيه بعد ما أتعصب وأرد رد ميعجبكيش علي سؤالك الخزعبلي المتخلف ..
واللي بتكون مرحلة الجمل النكدية المحفوظة اللي هتترص جنب بعض

= زي ايه ؟


- حاسه انك متغير .. مبقتش زي الاول .. في حاجة شغلاك ..
مين عبير فودة اللي عملالك لاف امبارح ..
كنت وييتنج من يومين مع مين ..
البنطلون اللي كان مرسوم عليه شجر توت وعجبني وقولتلك هاتهولي مجيبتوش ليه

= اه صح مجيبتوش ليه ؟


- هضيع نص ساعه في الرد علي الأسئله دي وتبرير موقفي
ومحاولة افهامك ان كل ده وهم جوه عقلك انتي بس ومش حقيقة ..

= تمام


- فها تلجألي للطريقة الأخطبوطية اللي هي كل ما تتزنقي وتلاقي ان سبب النكد وهمي واجاباتي بتفحمك ..
فتلجأي لأسباب نكدية تانيه ..
زي مثلا لو عايز نسيب بعض قول بس متلعبش بمشاعري ..
ياما قولتلك مش هقبل أكون هامش في حياتك ..
متتعصبش وتتنرفز عليا انا بنت ناس مش جايه من الشارع

= ما أنا مش جاية من الشارع يافايز


- عصبيتي ورغبتي في انهاء الخناقة النكدية هتخليني أجاوب وأقولك خلاص معنديش مانع نسيب بعض وهبعت لأبوكى دلوقتي وننهي الموضوع ونخلص من كل الزن ده

= ها

- بعدها هتجيبي ورا وتبدأي تقولي ردود درامية بحتة وتحكيلي عن قد ايه ضحيتي عشاني وياما كنتي معايا وكل مواقفك الحلوة معايا من يوم ما عرفتك ..
يتبعها عياط وتأسف عشان عصبتيني

= عشان بحبك بس


- بعدها الدايره بتقفل ان المشكلة بتنتهي عادي جدا وتبدأي مرحلة مصالحتي وتدلعي فيا وتوهمي نفسك اننا كنا خلاص هنضيع من بعض بس احنا ملناش غير بعض وهتطبخيلي الأكلة اللي بحبها انهارده عشان تصالحيني

= ايوه صح

- فاحنا ممكن نوفر كل ده علي بعض عشان متأخر علي الشغل ..
وتخشي دلوقتي المطبخ تبدأي تحضير مقادير الأكلة عشان تلحقي تخلصي قبل ما أرجع يا حبيبتي

= حاضر يا حبيبي

- يالا هتعوزي حاجة ؟

= تسلملي ربنا يخليك ليا يا رب

- يالا باي باي

= باي