|
 |
 |
 |
|
رقم المشاركة : ( 1 )
26 - 05 - 2026, 07:40 PM
|
|||||||||||
|
|||||||||||
 فيه حاجات جوانا لو خرجت زى ما هى… ممكن تجرح، تهدم، وتخلّى الدنيا أسوأ… لكن لما الروح القدس يلمس أى شىء… بيغيّره، يهذّبه، ويطلّعه فى صورة شبه قلب الله 🤍 ممكن يكون جواك غضب وكلام قاسى… ولو اتكلمت وقتها تخسر اللى قدامك. لكن لو سكت دقيقة قدام الروح القدس وقلتله: “اتعامل إنت”… تلاقى نفس الكلام خرج بهدوء وعتاب لطيف وحكمة تكسب القلب بدل ما تكسره. «لِيَكُنْ كُلُّ إِنْسَانٍ مُسْرِعًا فِي ٱلِٱسْتِمَاعِ، مُبْطِئًا فِي ٱلتَّكَلُّمِ، مُبْطِئًا فِي ٱلْغَضَبِ.» (يعقوب ١: ١٩) وممكن يكون جواك ألم ووجع من شخص أذاك… لكن لما تسلّمه للروح القدس، يلمس الجرح بشفاء ويحوّل المرارة لقوة غفران. زى يوسف… اتأذى واتظلم واتباع، لكن الروح القدس حفظ قلبه من الكراهية، فوقف قدام إخواته يقول: «أَنْتُمْ قَصَدْتُمْ لِي شَرًّا، أَمَّا ٱللهُ فَقَصَدَ بِهِ خَيْرًا.» (التكوين ٥٠: ٢٠) وممكن يكون جواك تشويش وأفكار ملخبطة وخوف من بكرة… لكن لما تعرض أفكارك على الروح القدس، يهدّى الزحمة اللى فى دماغك ويرتّبها. «لِأَنَّ ٱللهَ لَيْسَ إِلَهَ تَشْوِيشٍ بَلْ إِلَهَ سَلَامٍ.» (١ كورنثوس ١٤: ٣٣) وممكن يكون جواك اندفاع وردود فعل متسرعة… لكن لمسة الروح القدس تحوّل الاندفاع لتعقّل واتزان. زى بطرس… كان مندفع جدًا، لكن بعد امتلائه بالروح القدس بقى يتكلم بحكمة وقوة ويفتح قلوب الآلاف للمسيح. وممكن يكون جواك خوف شديد وضعف… لكن الروح القدس يحوّل الخوف لجرأة مقدسة. التلاميذ كانوا مختبئين من الخوف، وبعد حلول الروح القدس وقفوا يكرزوا بالمسيح قدام الجميع بلا خوف. «لِأَنَّ ٱللهَ لَمْ يُعْطِنَا رُوحَ ٱلْفَشَلِ، بَلْ رُوحَ ٱلْقُوَّةِ وَٱلْمَحَبَّةِ وَٱلنُّصْحِ.» (٢ تيموثاوس ١: ٧) وممكن يكون جواك قسوة أو رغبة فى الانتقام… لكن الروح القدس يلمس القلب الحجر ويخليه قلب حنون يعرف يحب ويترفق. «وَأَنْزِعُ قَلْبَ ٱلْحَجَرِ مِنْ لَحْمِكُمْ وَأُعْطِيكُمْ قَلْبَ لَحْمٍ.» (حزقيال ٣٦: ٢٦) الروح القدس مش بس بيمنع الوحش اللى جوانا… ده بيحوّل نفس المشاعر والأفكار والكلمات لشىء فيه نعمة وشفاء وسلام. علشان كده… قبل ما تتكلم… قبل ما تقرر… قبل ما ترد… قبل ما تنفجر من الوجع… اعرض كل حاجة على الروح القدس 🤍 لأن لمسته الواحدة قادرة تغيّر كل شىء. الروح القدس قوة عظيمة فينا… إنت مدرك ده؟! الله بنفسه ساكن فينا 💪🏻 
|
|
العرض الشجري