الشيخ ألعازار |ابطال فى الظل

[walaa farouk]

شخصيتنا النهاردة عن بطل رفض يمثل 👴🏻⚖️
الشيخ ألعازار

​البطل اللي علمنا إن "القدوة" أغلى بكتير من كام سنة زيادة نعيشهم في الدنيا.

​وقبل ما نبدأ، حكايتنا جاية من
"سفر المكابيين الثاني"
وهو واحد من "الأسفار القانونية الثانية"
اللي كنيستنا بتعتز بيها جداً ومليانة دروس بتبني الإيمان.

​الحكاية بدأت لما كان الملك "أنطيوخس"
بيجبر الناس يتركوا وصايا ربنا بالعافية.

وفي الوقت ده، ظهر "ألعازار"، راجل عجوز وقور، شعره أبيض ومن كبار الكتبة.

​الملك أمر إن الناس تاكل "لحم خنزير" غصب عنهم،
وده وقتها (في العهد القديم) كان ممنوع ونجاسة
حسب الشريعة اللي ربنا سلمها لموسى، زي ما مكتوب: 👇🏻
«وَالْخِنْزِيرَ... فَإِنَّهُ نَجِسٌ لَكُمْ. مِنْ لَحْمِهَا لاَ تَأْكُلُوا وَجُثَثَهَا لاَ تَمَسُّوا.»
(سفر اللاويين 11: 7-8)

​وفي العهد الجديد، ربنا ورّى القديس بطرس في الرؤيا لما نزل له إناء من السماء
زي "ملاءة" كبيرة فيها كل أنواع الحيوانات وقال له: 👇🏻
«قُمْ يَا بُطْرُسُ، اذْبَحْ وَكُلْ... مَا طَهَّرَهُ اللهُ لاَ تُدَنِّسْهُ أَنْتَ.»
(أعمال الرسل 10: 13-15)

فإحنا النهاردة بناكل لحم الخنزير عادي، لكن بالنسبة لألعازار زمان، كان الاختبار هو
"أمانته للوصية" اللي كانت موجودة وقتها)

​لما جه الدور على ألعازار، الجنود حبوا "يجاملوه" عشان سنه، وقالوا له:
"يا ألعازار، إحنا هنجيب لك لحم إنت مسموح لك تاكله (محلل)
وبس قدام الناس مَثِّل إنك بتاكل من اللحم اللي الملك أمر بيه
، وبكده تخلص من الموت ومحدش يحس!.

​ألعازار كان ممكن يوافق ويقول "أهو تمثيل"،
لكنه فكر في الشباب اللي
باصين عليه وقال: 👇🏻
«لاَ يَلِيقُ بِسِنِّي الرِّيَاءُ، لِئَلاَّ يَظُنَّ كَثِيرٌ مِنَ الشُّبَّانِ أَنَّ أَلْعَازَارَ
وَهُوَ فِي التِّسْعِينَ مِنْ عُمْرِهِ قَدِ انْتَقَلَ إِلَى مَذْهَبِ الأَجَانِبِ
.. فَأَكُونَ سَبَبَ ضَلاَلِهِمْ لأَجْلِ حَيَاةٍ فَانِيَةٍ.»
(2 مكابيين 6: 24-25)

​ألعازار رفض "يمثل" وفضل يموت وهو عنده 90 سنة بكرامة، على إنه يعيش "كذبة"
تكسر إيمان الشباب اللي بيشوفوه قدوة.

وهو بيموت من كتر الضرب، قال بسلام: 👇🏻
«يَعْلَمُ الرَّبُّ أَنِّي وَأَنَا قَادِرٌ عَلَى التَّخَلُّصِ مِنَ الْمَوْتِ، أُكَابِدُ فِي جَسَدِي آلاَماً شَدِيدَةً..
وَلكِنِّي فِي نَفْسِي أَقْبَلُ ذلِكَ بِسُرُورٍ لأَجْلِ مَخَافَتِهِ.»
(2 مكابيين 6: 30)

​طيب الحكاية دي بتقولنا إيه النهاردة؟
ألعازار بيقولك: "متعملش حاجة غلط وتقول محدش شايفني.. الصغيرين بيقلدوك".

ربنا بيقولك من خلال "سفر المكابيين":
"أمانتك في الحاجات الصغيرة والظاهرة قدام الناس، هي اللي بتشهد لإيمانك الحقيقي."

​بطولة ألعازار بتعلمنا إننا منجاملش على حساب الحق، حتى لو الثمن غالي.

ربنا عاوز يقولك: "أنا مقدر وقفتك وصمودك ومحافظتك على شكلك كابن ليا قدام الناس..
إنت عندي بطل".

​خليك زي ألعازار، خلي كلامك وموقفك واحد، وافتكر إن "القدوة"
هي أقوى وعظة ممكن تقدمها للي حواليك.

أبطال_الظل
الشيخ_ألعازار