القسوة والحزم كما يجب

[توتا كمال]

أنا عاوزه أعرف أنا قصرت معاكي في ايه إنتِ مفيش فايده فيكي.........

الشده والحزم

📌أولاً الشده بتكون زي الإهانه باشكالها
🤬زي الضرب...
🤬الكلام القاسي بأحكام ومقارنات وتهكم...الخ
🤬تعبيرات وشك المكشره أو المشمئذه من الغلط اللى حصل
🤬وإن يكون هدفك تفريغ غضبك مش إنك تعلمي البنت من الموقف

💚من حقك تزعلي وتغضبي من اللى حصل طبعًا من حقك

💚بس متغاليش في رد الفعل بشكل يحسس البنت إن دي نهاية العالم

💚وحطي في دماغك ديمًا إنها مش هتتعلم غير لما تغلط

💚وإنها محتاجه تدريب كافي على كل حاجه علشان تتقنها
ده إحنا الكبار بنفضل نتعلم لغاية ما نموت
فما بالك بطفله أو حتي مراهقه لسه نموها وعقلها مكتملش
------------------------------------------

📌أما الحزم فبيكون له أشكال كتير زي إنك تحطي قواعد تربوية لبنتك وتلتزمي بيها مهما كانت الضغوط مع حبة مرونه

يعني الطبيعي بتاعك يبقى تنفيذ القاعده التربويه اللى حطتيها بمنتهى الحكمه والرحمه ومفيش زن من البنت أو تدخل من الناس يرجعك ولكن يكون عندك حبة مرونه لو الظروف اتغيرت مثلًا والقاعدة بتاعتك محتاجه شوية تعديلات تناسب التغير اللى حصل او حتى محتاجه تتبدل

ولما يحصل غلط تحطي عواقب لها علاقه بالمشكله اللى حصلت علشان تعلمي البنت تتحمل مسؤولية مشاكلها ومتعرضهاش للعواقب من باب العقاب (طريقة الكلام هنا بتفرق قوي)

📌هديكي مثال للتوضيح
في موقف البنت جابت درجات قليله فيه

🤬بدل ما تزعقي وتقولي كلام يجرح وانا قصرت في ايه وانتِ مفيش فايده فيكي مهما جبت مدرسين في البيت مش بتفهمي برضو ومفيش نزول من البيت طول الأجازه (دي شدة وقسوة) ...الخ

🌷بدلي قسوتك بحزم :
تقولي مثلًا ...بحزم وحسم في نبرة الصوت وتعبيرات الوش .. أنا عارفه إنك ذاكرتي بس واضح إنك محتاجه تزودي مذاكره شويه وإن الوقت اللى كنا بنذاكر فيه مكنش كفايه وكمان شايفه إننا محتاجين نجرب طرق جديده

🌷وده طبعًا بعد ما تديها فرصتها لاقتراح حلول لحل المشكله بتاعتها مهما كان سنها

🌷وهنا هتحتاجي تاخدي بعض القرارات زي إنك تزودي ساعات مذاكرتها على حساب جزء من البريك وتلتزمي بالتنفيذ مهما كانت ضغوط البنت من زن وخلافه مع مراعاة قدر الراحه والترفيه(ده حزم )

🌟⭐ملحوظة:التصرف بحزم مقابل القسوة مش مقصور على الأمهات اللى بتتعلم تربية بس ده أوقات كتير بيبقى هبة من ربنا لأمهات كتير مش متعلمه خالص بس ده ميمنعش أنه لو مش عندنا نقدر نتعلمه......