واثق اخر طريق الصليب سما

[walaa farouk]

رغم اللي بنشوفه من الناس والعلاقات لكن بيبقي عندنا امل في تغيرهم للافضل
حتي لو بردو بنتخذل فيهم مره واتنين وعشره بس بنقول كلمه معلش اصل كذا يمكن كذا
والغريبه العكس مع ربنا
ايه اللي شوفناه من ربنا طول حياتنا علشان ممكن نقول عنه كلام صعب
(ماتكلمنيش عن ربنا .. هو اذاي ربنا يعمل ده وده وده )
طب قولي امتي سابك
امتي كل موقف عديت بيه كان صعب معلمكش كتير
امتي سابك جعان ولا محتاج
امتي ماوقفش في ضهرك
هاتقولي انا عاوز اشوفه بعيني
هاقولك انهي عين ؟
عينك دي اللي هي مش بتشوف حتي القليل
اقولك علي حاجه؟
شوفت صحابك اللي كانوا واقفين جنبك انهارده فين؟
مش دول اللي حطيت صورتهم وقولت انتوا اكتر من اخواتي
انهارده فين انهارده الصور دي مجرد ميموري بيطلعلك علي الفيس بتتوجع قلبك بيه وبس
ليه مش حاسس ان ربنا هو الضامن الوحيد فعلا
الغريبه ان اللي بيوجعونا بنحطلهم مليون عذر
وعند ربنا لو حطنا في اختبار او ماستجبش لطلب فيسمع منا ابشع كلام وبردو مش بيزعل
انا مافتكرش حد كمل معايا للاخر غيره حتي لو انا سيبته عمره ماسابني
ولا كسر عيني ولا ذلني ولا عايرني بحاجه ادهاني ولا مسك عليا غلطه
بنقول في العالم (حبيبك تبلعله الزلط)
بس انا حبيبي يسوع مش ابلعله الزلط لكن اشيل الصليب معاه
لاني واثق اخر طريق الصليب سما
ثق في ابوك مهما كان الامر
صلي وقوله يارب اظهر عجايبك عاوز اشهد عنك