قلب الله الأبوى
للأب القمص أفرايم الانبا بيشوى
انا عاوز أحبك،
نفسي ياربى يبقى
قلبي هو قلبك،
اللي يحب بدون مقابل،
واللي بالاحسان يقابل،
الاساءة والتجاهل،
واللي صابر،
على العدو قبل الصديق
واللي جحد قبل الرفيق،
بطمع ياربى ارتوى،
من نبع حبك القوى،
يا أحن أب.
وأقوى حب.
............
انا عاوز اقولك باللي بعانى،
واللي فى صمتي من معانى،
واللي فى عقلي من خواطر،
واللي فى ظروفي من مخاطر.
انا عايز أخطى خطوتى،
بحكمتك مش حكمتى،
وأبص للناس والمشاكل،
بنظرتك مش نظرتى،
أنا نفسي أعرف حكمتك،
فى اللي بيجرى فى دنيتي.
انا نفسي حايرة،
وارضي بايرة
وبلادي فايرة،
تصرخ وتطلب رحمتك،
من اللي ظلم،
ومن التعصب،
ومن المرض ومن الآلم.
قالوا عليك اله قدير،
ولكن كأنك بعيد كتير،
وكأنى انت حب عابر دنيتي.
وانت ضابط كونا كله،
وانت اللي قادر على الظالم، تقدر تذله،
وانت الاله اللي على المسكين تظله،
وانت الرحوم،
اللي بتغفر للخاطئ ذلله،
وتداوى علله،
......
سمعت صوتك بيقولى أصبر،
صلى وأغفر،
وللسماء انظر،
ضيقه وهتعبر،
انا يا أبنى شايف،
اللي بيجرى واللي هيجرى،
انا مش بنام ولا فى سفره،
وعنايتي حاضره،
فى كل خاطره وفى كل نظرة،
انا الهك وكمان ابوك،
بمسح دموعك،
واسمع انينك،
وأقوى إيمان الرعاة،
وألم اشتات الرعية،
أنا جاى سريعاً،
وهاتخلص ايديا،
وعندي ليكم نصرة قوية،
صلى وأصبر،
وأرمى يا ابنى
حمولك عليا.
