مجرد ذكرى هيفكرنا بيها الفيس

[walaa farouk]

يومين والكلام عنه هايقل.. وهانفتكره في الأربعين.. وبعد سنه هانقول زي انهارده راح السما
طب بنتغير؟.. بناخد قرارت؟.ولا حياتي هاتفضل تغيير لصوره او تغيير بوست؟
طب عارفين سامحوني سهل اوي اننا نقول آيات ونقول كلام يعزي ونوعظ مليون وعظه لما ابونا راح السما
طب مراته وولاده.. عارفين يعني ايه زوجه كاهن واولاد كاهن صغيرين ؟مهما قلتوا اه نعرف مش هاتبقوا عارفين... مش هاتبقوا عارفين يعني ايه كاهن بياخد الفين جنيه وقال كفايا عليا خدمتك يارب وزوجه بتقول وجودك وسطنا يا ابونا احسن من الفلوس .ماتعرفوش يعنى ايه زوجه كاهن مش بتشوفوا اصلا بس بتقول كفايا شايفه نجاحه في خدمته... اقولكوا علي حاجه اصعب اوقات كتير بتحصل عارفين لما الكاهن ينتقل للسما ويكون الكاهن واسرته قاعدين في بيت ملك الكنيسه مش ملكه هو عارفين ممكن يحصل ايه؟ الأسره بتمشي من البيت بعد رحيله .تخيل لو معندهمش مكان بقي.. مش متخيل صح؟بس ده بيحصل للاسف... عارف يعني ايه بنت او ولد يفقدوا حضن ابوهم عارفين فرحه ابن او بنت لما ابوهم يبقي بس أجازه.. عارفين احساس ابن او بنت الكاهن لما تلاقي كل شعب بيحب ابوها ويحضن في ابوها بتبقي ساعتها ولاد ابونا لما بيحضنوا ابوهم بيبقي حضن مختلف حضن بيقولوا فيه حضن ابويا ده بتاعي انا ولما تحضنه اكنها حضنت الكنيسه كلها... مهما قلنا ووعظنا وكتابنا وجعنا واننا موجوعين مش هايبقي زي وجع مراته وولاده.. عارف وانت بتكتب بوست عن ابونا اللي راح السما ممكن تكون بتاكل بتشرب بتضحك بتتفرج علي حاجه واسمنا موجوعين.. لكن اسرته لا بتاكل ولا بتشرب.. وولاده ممكن لحد دلوقتي مش مصدقين.. فقدان الكاهن صعب وصعب اوي.. لان الحياه اللي عايشها الكاهن مش زي مانتوا فاهمين ولو كنتوا شايفين ناس عايشين في ناس وجيل كامل من الكهنه بيصلي زيك كده ويقول يارب دبرها وسدد اللي عليا... ارجوكوا دعوه للجميع كل قداس تذكروا اسره ابونا سمعان وقولوا يا روح الله عزيهم.. يا روح الله قويهم.. يا روح الله اسندهم..هو ابو اليتامي وقاضي الارامل.. صلاتنا اهم بكتير من كلامنا اللي بكره وبعده هايبقي مجرد ذكري هايفكرنا بيها الفيس