اقلع الكوتشى قبل ما تدخل

[walaa farouk]

عارف لما ترجع بيتكم وممتك تكون ماسحه ،وتكون واقفه على باب الشقه وتقول أقلع الكوتشى قبل ماتدخل 😡...
تقوم انت ياعينى مغلوب على امرك وتفك الرباط بتاع الكوتشى عشان تدخل ...
ووسط تعبك وحر الشمس والعطش، الرباط يتعقد ومايرضاش يتفك ..
هاتعمل ايه ؟ هاتبات على السلم ؟ طبعا ماينفعش ، هاتصعب على ممتك مثلا وتقولك ادخل بالكوتشى ؟ لا إنسى دانت تروح إيطاليا أسهل من انك تدخل الشقه بالكوتشى 😂،
بتقلعه بردو حتى والرباط متعقد .... او تقعد تركز خمس دقايق لغاية ما العقده تتفك، صح ؟
طيب ماحنا شاطرين اهو وبنعرف نفكر كويس
ليه بقى لما حياتنا تتعقد بكذا مشكله وماتتفكش ، مانقعدش كدا بهدوء وتركيز ونفكها وندور على حل سليم ... او نشيلها خالص وننساها ونسيبها لربنا يحلها من عنده ..
ليه لما نقع فى مشكله نخاف قووووى ودماغنا تجيب وتودى من نتايج المشكله اللى هاتطربق فوق دماغنا لو اللى خايفين منه حصل .. طيب ليه مانحافظش على هدوئنا ونفكر فى الحل قبل ما ننشغل بالمصايب والكوارث اللى فى الغالب مابتحصلش وبتكون مجرد خيالات وهميه وظيفتها الأساسيه رعبنا وبس ...
ليه نشيل عقدنا ومشاكلنا وندخل بيها جوه كل حاجه حلوه في حياتنا ونبوظها لغاية ما حياتنا بقيت شبه تلاجة فلانتينو فى فيلم بوحه 😂..
ليه مانعملش فاصل ونستمتع باللحظه الحلوه ، ونرجع نفكر بهدوء عشان نحل العقده .... ليه ها ؟