هو أنت ليه مش مصاحب مراتك ؟

[Mary Naeem]

هو أنت ليه مش مصاحب مراتك ؟

تقول آية : "

اشتغلت في أماكن كتير دايرة معارفي كبيرة حبة حبتين تلاتة.. أكتر حاجه كنت بلاحظها –بما إني غاوية ملاحظة– إن أي راجل بيحتاج صاحبة ليه، المعروف عن الرجاله إنهم مبيحبوش الرغي مع بعض ولا الكلام الكتير ولا الشكوى.. لا يشتكوا ولا يحبوا حد يشتكي ليهم فتلاقي أي راجل يميل إن يكون في بنت قريبة منه تسمعله وتفهمه وتاخد رأيه وياخد رأيها .
دايمًا في أي مكان اشتغل فيه كنت بستغرب هو ليه لما مراته تكلمه فيي التليفون بلاقى تون حاد وردود من نوعية "ماشي ماشي طيب خلاص بقي خلاص مش وقته لما أرجع أنا في الشغل" مع إنه عنده استعداد يرغي مع زميلته في الشغل بالساعات!! لو دورت على السبب هتلاقي إن مراته مش صاحبته.. هيا مجرد زوجة مش شايف فيها صاحبته!
نرجع لورا شويه بقي قبل الجواز، وقت الاختيار.. اختيار شريكة حياتك، معظم الولاد بتقع فى غلطة "الاختيار المناسب" لما بيجي يتجوز بتسيطر عليه معايير غريبة وأكتر معيار بيغلب عليه معيار "الزوجة المناسبة" بيشوف مين البنت اللي تصلح تكون زوجة مناسبة ليه مش بياخد باله من أهم معيار وهو معيار "الصداقه"، مع إن دي أول حاجه بيدور عليها بعد الجواز ومع المسؤلية والضغوط بيحتاجها صاحبة أكتر من إنها تكون زوجة، لكن لو ركزنا حوالينا هنلاقي إن أغلب الجوازات الناجحة أبطالها كانوا أصدقاء.
لما بتتجوز صاحبتك أو بني آدمة في بينكم حاجات مشتركة ممكن تخلق "صحوبية" بعد كدة –بعد الجواز– دا أحسن ليك لأنه غير مقبول إنك بعد ما تتجوز يكون ليك صاحبه بتحكلها وبترتاح معاها وبترغي معاها أكتر من مراتك. طيب تخيل العكس لو كانت هيا اللي ليها صاحب كان زمنها متعلقة مكان المروحة!
دايما بنسمع جملة "الحب بيروح بعد الجواز وبيتحول لعشرة" اتفقت أو اختلفت مع الجملة دي بس أكيد عمرك ما سمعت حد قال الصداقة راحت بعد الجواز، الصداقة دي هيا اللي بتهون وقت الصعب هيا اللي بتخلي في تفاهم وقت المشاكل "الصداقة مش بتروح بعد الجواز".
اتجوز اللي متملش من الكلام معاها، اللي فاهمين بعض، اللي بتفهمك حتى وانت ساكت وعارفة إيه اللي بتحبه وإيه بيضايقك.. اللي عارفة امتى تسألك مالك وامتى تسيبك تهدى علشان عارفة إنك مبتحبش تتكلم وانت في الحالة دي، اتجوز اللي حفظاك أكتر من أي حد تاني اتجوز اللي بعد ما تتجوزها مش هتروح تدور على صاحبة تدردش معاها.. اتجوز صاحبتك أو اللي تنفع تكون صاحبتك.