العدل والمساواة

[توتا كمال]

❌❌❌أوعي تعطي ولادك زي بعض أبدًا

لما ولادي كانوا صغيرين كنت بحاول على قد مقدرتي أجبلهم زي بعض بالظبط👌 علشان مظلمش حد فيهم رغم إنهم ولد وبنت

ومع ذلك كنت بحس إني ظالمه حد فيهم ديمًا وهما مكنوش بيبقوا راضين😞

لغاية ما كنت بحضر محاضرة في دبلومة تعديل السلوك اللى كنت بدرسها من كذا سنة

وسمعت الدكتور بيقول:
أنا ممكن أنزل اشتري لحد من ولادي حاجه من غير ما أجيب للباقي زيها علشان العدل مش معناه المساواة

وكنت أول مره أفهم الموضوع ده

وكمل الدكتور شرح وقال:
أن المساوة إني أديهم كلهم زي بعض بالظبط من غير ما أراعي احتياجاتهم المختلفه ولا الفروق الفردية بينهم
وأن العدل هو إني اراعي احتياج كل واحد والفروق الفرديه بينهم من غير ما اظلم الباقي

⚡هديكم مثال يوضحلكم الموضوع أكتر:
يعني ممكن أجيب لبنتي فستان لأن هدومها صغرت عليها ومجبش لأبني أي هدوم وقتها لأنه مش محتاج في حين إن في وقت تاني ممكن أجبله طقم كوره علشان محتاجه في التمرين من غير ما أجبلها حاجه

⚡مثال تاني:
ممكن أدي لأبني الصغير أحضان أكتر من أخته شويه لأن دي لغة حبه في حين إن ممكن أدي لأخته كلمات تشجيع أكتر شويه لأن دي لغة حبها المختلفة عن لغة أخوها (فهنا أستخدمت الأحضان والتشجيع مع الأتنين بس بنسب مختلفة)