حرامية

[walaa farouk]

حرامي الفلوس ده الأشهر ، بس مش الاخطر ..

فيه حرامي السمعة ، اللي فيها واحد يستحل سيرة إنسان ،
و يشوه سمعته بالكلام و النشر و التشهير ..

التشهير تدمير ، سرقة تحرم انسان من كرامته
و قيمته و مكانته و تكسر راسه و تذل نفسيته..

حرامي الفرح نوع تاني من السرقة ،
ينكد حياة إنسان بكلام جارح و سخرية قاتلة .
. بشوف حد بيضحك و ما يرتحش غير لما بقلبها له غم و هم
، و ينغص حياته و يوقع بينه و بين الناس
، و ينقل له أسوأ الاخبار ..

حرامي الثقة نوع تالت.. انك تقصد إنسان تثق فيه في خدمة
انت عارف انه يقدر عليها و يمتنع عنها أو يخذلك
و يسيبك في حزنك و كسرتك ،
و يخليك تشوف الدنيا كلها سودة بسببه..

حرامي الأمان نوع رابع ، اللي عايش يهز راحة بال الناس..
منين ما يشوف واحد مرتاح يلخبط له حياته ،
و يخدع واحد علشان مصلحته و يوهمه انه بيحبه
و هو بيسرق حقوقه ..

حرامي الأخلاق نوع خامس ، اللي يسرق طيبتك
و يعلمك الشر و النجاسة و يفسد أخلاقك
علشان ما تبقاش احسن منه ..

يا ما حرامية حوالينا ، سرقت من الناس الخير ،
و حرمتهم من فرحتهم و سلامهم ..

اللي سرق يا يرجع اللي سرقه يا ح يدوق من نفس كاسه
و يتسرق زي ما سرق ..
و اللي اتسرق له اله عادل قادر يرجعله حقه اللي راح و بالتعويضات..