دلق القهوة خير

[walaa farouk]

ناس بتقول ان ليها قصة قديمة عن واحد أسمه "خير "
اشتهر بدلق القهوة ، و بعدين اتطور استخدامها ..

طبعا مفهوم أن ده مش خير و لا حاجة ،
إنما دي جملة عبقرية بنستخدمها لرفع الحرج عن الضيف
اللي القهوة بتقع من ايده .
. لكن جملة بتريح و تدي طاقة إيجابية، و تخلي النفس مرتاحة و ومبسوطة، و تدي جو حلو،
و لما تصدقها تخللي كل طاقاتك تروح للخير و النجاح..

يبقي اي حاجة تشوفها محرجة او سلبية قول وراها "خير"
أو "خير كتير و وفير" ..

اتأخرنا أو وصلنا بدري يبقي "خير"
، عملنا أو ما عرفناش نعمل يبقي "خير"
، جبنا درجة حلوة او مش زي ما كنا بنحلم يبقي "خير"
، لقينا اللي عاوزينه أو ما لقيناش يبقي "خير " ..

قولها لنفسك قبل ما تقولها لغيرك، قولها في السر و العلن
، قولها في الصلاة و الترنيم..
كلمة الخير تجيب الخير و تكتره و تضاعفه ..

كل الأشياء تعمل معا للخير(رومية ٨ : ٢٨)

مش مجرد آية دي حياة و اتجاه و طاقة و نور ..

حتي دلق القهوة يبقي خير ..