"سرايا بن نيريا" | ابطال فى الظل

[walaa farouk]

شخصيتنا النهاردة عن بطل علّمنا إن
"أمانتك لربنا مفيهاش إجازة.. حتى وأنت في قلب الشدة" 📜🔥

"سرايا بن نيريا"
لما بنسمع عن السبي وخراب أورشليم، بنحس بوجع كبير..
لكن النهاردة حلقتنا عن "بطل ظل"
حكايته تبين لك إزاي الواحد ممكن يخدم ربنا وهو في أصعب ظروفه.

وعلى فكرة بقى.. معلومة على الماشي: 💡
سرايا ده يبقى أخو "باروخ بن نيريا"
اللي حكينا عنه قبل كدة
(اللي كان بيكتب لإرميا النبي)

يعني بيت كله خدام، واحد بيمسك القلم،
والتاني بيمشي السكك الصعبة.

وقبل ما نبدأ...
حكايتنا جاية من "سفر إرميا" (الأصحاح 51)

يلا بينا نشوف حصل إيه....
تخيل معايا المشهد.. الملك "صدقيا" مسافر بابل، وواخد معاه "سرايا بن نيريا"
لأنه كان «رئيس محلة» يعني هو اللي مسؤول عن "مقاسات"
الملك وأماكن راحته ونومه في الطريق.

وهما بيجهزوا علشان يمشوا ،
إرميا النبي كتب كل النبوءات في "سفر واحد" وسلمه لسرايا.

الآية اللي بتوثق لحظة التسليم ومهمة سرايا بتقول: 👇🏻
«فَالأَمْرُ الَّذِي أَوْصَى بِهِ إِرْمِيَا النَّبِيُّ سَرَايَا بْنَ نِيرِيَّا...
عِنْدَ ذَهَابِهِ مَعَ صِدْقِيَّا مَلِكِ يَهُوذَا إِلَى بَابِلَ... وَكَانَ سَرَايَا رَئِيسَ مَحَلَّةٍ.»
(إرميا 51: 59)

إرميا قاله: يا سرايا، وأنت رايح تنظم مكان الملك وتشوف راحته،
م تنساش المهمة الأهم.. أول ما توصل بابل وتدخلها، بص في الكتاب ده واقرأه!
والآية اللي بتحدد المهمة بدقة: 👇🏻
«فَقَالَ لَهُ إِرْمِيَا: إِذَا دَخَلْتَ بَابِلَ فَانْظُرْ وَاقْرَأْ كُلَّ هذَا الْكَلاَمِ.»
(إرميا 51: 61)

تخيلوا؟ سرايا مأعتذرش بحجة
"تعب السفر" أو إنه "رئيس محلة"
مشغول براحة الملك،
لأ دا أخد الكتاب ونفذ المهمة في قلب بابل.

ولما خلص قراءة..
ربط الكتاب بحجر ورماه في نهر الفرات،
عشان يقول لكل اللي شايفين:
"زي ما الحجر ده غرق، بابل بكل جبروتها هتقع وتغرق ومعدش تقوم تاني".👇🏻
هكَذَا تَغْرَقُ بَابِلُ وَلاَ تَقُومُ، مِنَ الشَّرِّ الَّذِي أَنَا جَالِبُهُ عَلَيْهَا، وَيَعْيَوْنَ.
(إرميا 51: 64)

دي البطولة اللي بجد..
واحد رايح في مأمورية شغل (رئيس محلة)
لكن محولها لخدمة لربنا ورسالة تعزية لكل المسبيين.

قصة سرايا بن نيريا بتقولنا النهاردة...
إن بطل الظل هو اللي بيستغل "مكان عمله" و"مسئولياته" عشان يوصل كلمة ربنا.

ربنا عاوز يقولك من خلاله..
ما تقولش "أنا مشغول في شغلي" أو "مسئول عن راحة الناس"
.. سرايا كان "رئيس محلة" ومسئول عن ملك،
ومع ذلك لما إرميا سلمه الكتاب، كان بطل وشال رسالة ربنا بكل قوة.
خليك بطل في مكانك.
استنونا المرة الجاية في حلقة جديدة من...
أبطال_الظل
سرايا_بن_نيريا