العنوسة مش مرتبطة بالجواز.. ممكن واحدة تتخطب وتتجوز وكمان تجيب عيال.. ومع ذلك تفضل عانس.. قلبها عانس.. ماحبش ولا لقى اللي شبهه ولا قرر يكمل عشان فعلاً بيحب .. "قلب عانس".. خايف من الوحدة ومن الوقت اللي بيعدي بسرعة، فا رضي بأول عريس مناسب واتخدع بكلام الناس، واكتفى بمجرد جوازة حلوة اجتماعياً..
قلب عانس.. كان فاكر مجرد الجواز هايشبع جوعه العميق للحُب، و اهي جوازة والسلام.. ونبقى نشوف موضوع الحب ده بعدين.. والجوازة جت.. بس الحب مابيجيش للأسف.. لأن دي مش جوازة.. دي مجرد تمثيلية سخيفة بهتانة، بندفن فيها حياتنا ومشاعرنا واحنا فاكرين اننا بنحافظ عليها.. عشان كدة بعد الجواز تلاقي الطرفين حاسين بالوحدة.. جعانين حُب وهما في وش بعض طول اليوم، كأنهم مش متجوزين.. كأنهم مش موجودين اصلاً.. كل واحد في وادي.. تمثيلية سخيفة.. عشان من البداية كل واحد فيهم قرر ياخد الطريق السهل والأقل خساير ويتجوز علي طول من غير حُب..
الحُب مخاطرة.. ايوة مخاطرة..
ممكن مايكملش؟ ايوة..
بس لو كمل هايبقي احلي انجاز في حياتك.. ماتبُص علي هوشع ازاي لما قدر يحب كمل للآخر.. أو حتي يعقوب وراحيل ازاي استنى ووصل للي بيحبها.. صدقني الحب يستاهل انك تطلع بره القيود الاجتماعية، تنسى الناس هاتقول ايه؟! تستنى سنين وتكافح عشان توصل للي معاك مهما كانت الظروف صعبة والناس ضدك.. يستاهل انك تفرح بكلمة "بحبك" وكأنك لقيت كنز.. وتمسك في حبيبك بإيديك وسنانك عشان تكملوا..
الحُب يستاهل المخاطرة، أصلاً ولا حاجة تانية تستاهل المخاطرة غيره..
نصيحة اخيرة: عنّسي.. بس اوعي ترضي بأي جوازة والسلام.. لأن هي دي العنوسة اللي بجد!
